Jyl aıaǵyna deıin elorda mektepterinde jańa 5 ınklıýzııany qoldaý kabıneti ashylady. Barlyǵy, buǵan deıin iske qosylǵandardy eseptegende, tıisti 10 keńistikti Astanadaǵy mektepte oqıtyn erekshe balalardyń 10 paıyzy qoldana almaq.
Oqý jylyna oraı esigin aıqara ashqan bas qaladaǵy 5 ınklıýzııa kabıneti nátıjesinde 150-den astam múgedektigi bar bala qatarlastarymen birge mektepte oqyp jatyr. Jańa sıpattaǵy synyptar buǵan deıin sol jaǵalaýdaǵy №22 mektep-gımnazııada, №36 orta mektepte, K.Myńbaev atyndaǵy №59 mektep-lıseıde, Á.Bókeıhan atyndaǵy №76 mektep-lıseıde jáne №97 mektep-gımnazııasynda tabysty jabdyqtaldy. Endi memlekettik standartqa saı, qor men sarapshylar tarapynan jetildirilgen tyń úlgidegi ınklıýzııa kabınetteri jeltoqsan aıynda Esil ózeniniń oń jaǵasyndaǵy №32, 52, 61, 65, 90 mektepterde ashylmaq. Osylaısha, erekshe qajettiligi bar taǵy 238 bala oı-sanasyn keńeıtip, damýǵa múmkindik alady. Barlyq mektepte ár balaǵa derbes baǵdarlama qarastyrylyp, muǵalimderge bir jyl boıy ádistemelik qoldaý jasalady.
«Barsha tarapty Astana qalasynda ınklıýzııany qoldaý kabınetteriniń sanyn 10-ǵa jetkizýge belsendi atsalysýǵa shaqyramyz. Máselen, iri kompanııalar qoǵamdaǵy kraýdfandıng bastamalaryna qosylyp, jarna jasaý arqyly qoǵam men bıznes úndestigine qadam jasaı alady. Osylaısha bıznes ókilderi sk-trust.kz saıtyndaǵy QR kod nemese esepshot derektemesi arqyly qaıyrymdylyq bastamalardy qoldasa, quba-qup. Sáıkesinshe, kásipkerler qoǵammen baılanysyn jaqsartyp, áleýmettik jaýapkershiligin nyǵaıta túsedi. Ári bul qadam qoǵamda qaıyrymdylyq mádenıetin damytýǵa yqpal etedi», deıdi «Samruk-Kazyna Trust» KQ bas dırektory Alfııa Adıeva.
Sonymen qatar taıaýda, Respýblıka kúnine oraı qor qoldaýymen Aqmola oblysynyń 4 birdeı aýylynda ınklıýzııa bólmesiniń tusaýy kesildi. О́ńirdiń aýyldyq jerlerindegi erekshe balalardyń sapaly bilim alýyna jaǵdaı jasaýda ınklıýzııa kabınetteri Orazaq, Qyzyljar, Qaramendi, Y.Altynsarın aýyldarynda qoldanysqa berilse, taǵy bireýin aldaǵy ýaqytta Kókshetaý qalasynda paıdalanýǵa tapsyrý josparlanyp otyr. Jalpy somasy 87,3 mln teńgeni quraıtyn 5 ınklıýzııa kabınetiniń jumysy nátıjesinde kem degende mektepke, balabaqshaǵa baratyn, úıden oqyp kelgen múgedektigi bar 120 bala qamtylady.
Qor bıylǵy kompanııalar tobyndaǵy eńbek adamdaryna arnalǵan korporatıvtik sharalardan túsken qaıyrymdylyq qarajatyn da ınklıýzııa kabınetterine baǵyttamaq. Máselen, «Samruk-Kazyna Trust» KQ uıymdastyrýymen «Samuryq-Qazyna» AQ kompanııalar tobynyń kásiporyndary arasynda ótken «SK Ázil Fest» kóńildi tapqyrlar qaıyrymdylyq keshinen túsken qarjyǵa kem degende bir ınklıýzııa kabınetin ashý mejelenip otyr.
Aldabergen KEMPIRBAI