Almaty qalasynda «Turktime: túrki elderiniń medıa jáne týrızm birligi» ataýymen IV halyqaralyq túrkitildi jýrnalısterdiń medıa forýmy ótti. Keleli keńeske elimizdiń BAQ ókilderimen qatar Brıtanııa, Germanııa, Túrkııa, Ázerbaıjan, Soltústik Kıprden kelgen týrızm jáne medıa salasynyń sarapshylary qatysty. Onda dástúrli jýrnalıstıka men dijital júıe, jasandy ıntellektiniń jańa úrdisteri jáne geosaıası ahýaldyń túrki elderindegi aqparattyq naryqqa áseri talqylandy, dep habarlaıdy Egemen.kz.
Halyqaralyq forýmnyń alǵa qoıǵan basty maqsatynyń biri – túrki elderiniń medıa keńistigindegi salalyq jýrnalıstıkanyń sapasyn arttyrý. Buny qalaı túsinemiz? Kópshilik sanasynda jýrnalıstıka kez kelgen taqyrypty qamtı berýge tıis degen jalpy jáne jadaǵaı túsinik bar. Alaıda dúnıe dıdaryna dúrbimen úńile qarasaq, onyń kún ótken saıyn kúrdelenip bara jatqanyn baıqaýǵa bolady. Bul úderistiń negizinde biliktiligi joǵary mamandy talap etetin salalar damyp keledi. Jalpylama taqyryppen jumys isteıtin tilshiniń daǵdysy endi azdyq etip, ár salanyń qyr-syry men kúrdeli qurylymyn túsinetin mamannyń qajettiligi týyp otyr. Olar sol kúrdeli dúnıeni aýdıtorııaǵa túsinikti tilmen jetkizýge tıis.
Aqparat aıdynynda endi-endi damyp kele jatqan osyndaı salanyń biri – ekonomıkalyq jýrnalıstıka. Biz habarlap otyrǵan medıa forýmnyń basty jańalyǵy – qarjy taqyrybynda halyqty aqparattandyryp júrgen jýrnalıster arasynda ótken «Erkin sóz-2024» shyǵarmashylyq baıqaýy. Baıqaý «Túrkitildes jýrnalıster qory» men «Halyq bank» aksıonerlik qoǵamnyń yjdaǵat-qoldaýymen jyl saıyn dástúrli túrde ótip keledi.
Sonymen medıa-báıge qorytyndysy boıynsha «Úzdik telesıýjet» atalymy KTK arnasynyń tilshisi Ulan Nurahmetke buıyrdy. Al «Saıttaǵy úzdik maqala» atalymyna atrpress.kz saıtynyń tilshisi Amandyq Saǵyntaıuly laıyq dep tanyldy. Al basylym betinde jaryq kórgen «Úzdik maqala» atalymyn áriptesimiz, «Egemen Qazaqstan» gazetiniń tilshisi Eligimaı Tóńker jeńip aldy. Jýrnalıst «Jeke tulǵa bankrottyǵy: máseleniń mánisi» taqyrybynda zertteý jasap, alaıaqtyq jolmen nesıe rásimdeıtin krımınaldy naryqtyń kiltıpanyn anyqtap, qarjylyq qaýipsizdik joldaryn aıqyndaǵan.
Forýmnyń qorytyndy bóliminde túrki elderine ortaq medıa platforma jasaqtaý qajettiligi talqylanyp, taraptar ózara tıimdi joba ázirleýge ýaǵdalasty.