Prezıdent janyndaǵy Memlekettik basqarý akademııasynyń qurylǵanyna 30 jyl tolýyna oraı halyqaralyq ǵylymı-praktıkalyq konferensııa ótti.
Konferensııanyń ashylýynda Prezıdent Keńsesiniń basshysy Baqytjan Sarıev Memleket basshysy Qasym-Jomart Toqaevtyń quttyqtaýyn jetkizdi.
«30 jyl ýaqyt aralyǵynda akademııa elimizdiń bilim júıesindegi bedeldi oqý oryndarynyń birine aınaldy. Memlekettik qyzmetshilerdiń biliktiligin shyńdaý isin jetildirip, ony jańa deńgeıge kóterdi. Ozyq oıly, otanshyl ári kásibı mamandar daıarlaýdyń ózindik dástúrin qalyptastyrdy. El múddesin bárinen bıik qoıyp, Ádiletti Qazaqstandy qurýǵa atsalysý – árbir memlekettik qyzmetshiniń mindeti. Olardyń adal, jańashyl ári jasampaz bolýy asa mańyzdy. Akademııa osy asyl qasıetterdi ár túlektiń boıyna sińirip, memleketshil mamandardyń jańa býynyn tárbıeleýge zor úles qosyp keledi. Munyń bári oqytýshylar qaýymynyń eseli eńbeginiń nátıjesi ekeni sózsiz. Bilim ordasynyń ujymy aldaǵy ýaqytta da el ıgiligine qyzmet ete beredi dep senemin», delingen Prezıdent quttyqtaýynda.
Konferensııanyń plenarlyq otyrysynda Ortalyq saılaý komıssııasynyń tóraǵasy Nurlan Ábdirov, qoǵam qaıratkeri Jaqsybek Qulekeev, Astana memlekettik qyzmet haby Basqarýshy komıtetiniń tóraǵasy Álıhan Baımenov, Memlekettik qyzmet isteri agenttiginiń tóraǵasy Darhan Jazyqbaı, Ǵylym jáne joǵary bilim mınıstri Saıasat Nurbek, Brıýssel dıplomatııalyq akademııasynyń dırektory (Belgııa) Gıýnter Goblom quttyqtaýlaryn jetkizdi.
«Servıstik jáne klıentke baǵdarlanǵan memlekettik qyzmetti qalyptastyrý» seksııasynda azamattarmen ózara is-qımyldyń servıstik modeli, memlekettik qyzmetterdi azamattardyń jeke qajettilikterine beıimdeý máseleleri talqylandy. Al akademııa rektory Erlan Ábil oqý ordasynyń jetistikterine qysqasha toqtaldy. Onyń aıtýynsha, akademııa elimiz boıynsha Ulttyq standarttarǵa sáıkes adamı resýrstardy basqarý jáne jobany basqarý boıynsha personaldyń sáıkestigin rastaıtyn jalǵyz akkredıttelgen organ mártebesin ıelengen.
Sondaı-aq seksııaǵa sheteldik seriktester, Memlekettik basqarý akademııalarynyń rektorlary, Býrgas aımaǵynyń gýbernatory (Bolgarııa) Marııa Neıkova, Muhammed ben Rashıd atyndaǵy Memlekettik basqarý mektebiniń atqarýshy prezıdenti (BAÁ) Alı bın Sebaa Al-Marrı, Kl. Ohrıd atyndaǵy Sofııa ýnıversıtetiniń rektory (Bolgarııa) Georgı Vlchev, Qyrǵyz Respýblıkasy Prezıdentiniń janyndaǵy Memlekettik basqarý akademııasynyń rektory Almazbek Aqmatalıev, Armenııa Prezıdentiniń janyndaǵy Memlekettik basqarý akademııasynyń rektory Hachatýr Kazeıan, Tájikstan Respýblıkasy Prezıdentiniń janyndaǵy Memlekettik basqarý akademııasynyń rektory Safarzoda Davron Djýrahon, Reseı Federasııasy Prezıdentiniń janyndaǵy Halyq sharýashylyǵy jáne memlekettik qyzmet akademııasynyń prorektory Andreı Margolın, Oral federaldy ýnıversıtetiniń Memlekettik basqarý jáne kásipkerlik mektebiniń dırektory (Ekaterınbýrg) Alekseı Klıýev, Mıkolas Romerıs ýnıversıtetiniń Memlekettik basqarý ınstıtýtynyń dırektory (Lıtva) Andrıýs Stasıýkınas qatysty.
Konferensııanyń «Memlekettik basqarýdaǵy qazirgi tendensııalar» seksııasyna memlekettik basqarýdyń ózekti máseleleri jáne úzdik tájirıbeleri talqylandy. Seksııada alǵashqy bolyp BUU-nyń Qazaqstandaǵy damý baǵdarlamasynyń turaqty ókili Katarjına Vavernıa baıandama jasady.
Sonymen qatar mereıtoı aıasynda akademııa túlekteriniń forýmy ótti. Forýmǵa óńirlerden akademııanyń 1996 jyldan bergi ár jylǵy túlekteri keldi.