• RUB:
    6.68
  • USD:
    520.93
  • EUR:
    609.07
Basty saıtqa ótý
Qoǵam 19 Qarasha, 2024

Memlekettik basqarý akademııasynyń 30 jyldyǵyna arnalǵan poshta markasy shyǵaryldy

80 ret
kórsetildi

«Qazposhta» AQ alǵash ret «Estelik jáne mereıtoılyq datalar» serııasy boıynsha Akademııanyń 30 jyldyǵyna arnalǵan poshta markasyn shyǵardy. Mereıtoılyq markany qoldanysqa engizý rásimine Akademııa rektory Erlan Ábil jáne «Qazposhta» Basqarma tóraǵasy Ásel Janasova qatysty, dep habarlaıdy Egemen.kz.

Akademııanyń qalyptasý jáne damý tarıhy memleketimizdiń tarıhymen tyǵyz baılanysty. Akademııa memlekettik apparatta adamı kapıtaldy arttyrýǵa barynsha úles qosyp keledi. Rektor búgingi is-shara oqý ordasy úshin tarıhı ári óte mańyzdy ekenin aıtty.

«Mereıtoılyq poshta markasyn shyǵarý – biz úshin erekshe ári alǵash ret bolyp otyr. Bul Akademııa úshin ǵana emes, elimizdiń memlekettik basqarý salasy úshin de tarıhı oqıǵa.  Akademııanyń memlekettik basqarý júıesindegi róli erekshe. Biz tek memlekettik organdarmen ǵana emes, sondaı-aq ulttyq kompanııalarmen, kvazımemlekettik uıymdarmen de tyǵyz baılanystamyz. Maqsatymyz – Prezıdenttiń aldymyzǵa qoıǵan maqsat-mindetterin oryndaý, halyqtyń ál-aýqatyn jaqsartý boıynsha jumys júrgizý. Seriktestik aıasynda Akademııanyń Assessment-ortalyǵy osy jyly «Qazposhta» qyzmetkerleriniń quzyrettilikterin anyqtady. Áriptestigimiz odan ári jalǵasady degen senimdemin», dedi Erlan Qýanyshuly.

«Qazposhta» Basqarma tóraǵasy Ásel Janasova Akademııany mereıtoıymen quttyqtap, is-sharanyń mańyzdylyǵyn atap ótti.

«Akademııa elimizdiń bolashaǵyna, jańa formasııadaǵy bedeldi kadrlardy daıarlaýdaǵy úlken  qyzmetterińizdi baǵalaımyz. Bıyl biz «Qazposhta» qyzmetkerleriniń biliktiligin arttyrýdy bastadyq. Akademııa úlken jetistikterge jete bersin. Poshta markasy – tarıhta qalatyn dúnıe. Keleshek urpaq osy poshta markalary arqyly tarıhty eske alyp otyrady. Akademııany búgingi tarıhı merekesimen quttyqtaımyn. Bolashaqta jetistikterge birge jete bereıik», dedi Ásel Jubanyshqyzy.

Qoldanysqa engizilgen markada Akademııa ǵımaraty jáne kók tústi 30 jyldyq mereıtoı logotıpi beınelengen. Bir paraǵynda 4 markasy bar estelik poshta markasy tórt boıaýly ofsetti baspada jasalǵan, perforasııasy – jotaly. Markanyń nomınaly – 500 teńge, taralymy – 5000 dana. Akademııanyń 30 jyldyǵyna arnalǵan poshta markasyn qoldanysqa engizý rásiminde eki mekeme basshysy arnaıy poshtalyq shtempelmen konvertke mór basyp, qolyn qoıdy.