Memleket basshysy Qasym-Jomart Toqaevtyń Belgradqa resmı sapary aıasynda Serbııa azamattary Lazar Koıch pen Dragomır Karıchti marapattaý rásimi ótti. Olar Qazaqstan Respýblıkasyna sińirgen erekshe eńbegi úshin II dárejeli «Dostyq» ordenimen marapattaldy. Bul joǵary marapattardy Premer-mınıstrdiń orynbasary Serik Jumanǵarın tapsyrdy. Bul týraly Aqorda baspasóz qyzmeti habarlady, dep jazady Egemen.kz.
Lazar Koıch – Qazaqstanda júgeriniń jańa sorttaryn ósirý jónindegi ǵylymı jobanyń jetekshisi. Ol – elimizdegi júgeri seleksııasy jáne tuqym sharýashylyǵy baǵdarlamasynyń turaqty basshysy jáne bas seleksıoner. Onyń jumysy arqyly Qazaqstanda júgeriniń 18 birlesken qazaq-serb gıbrıdteri túzildi. Nátıjesinde Qazaqstan osy daqyldyń tuqymyn ımporttyq almastyrýdy júzege asyrdy, elimiz tuqym materıaly ımportynan táýelsiz boldy. Jyl saıyn L.Koıch eńbek etetin «Býdan» JShS birinshi býynnyń júgeri tuqymyn óndiredi jáne el naryǵynyń 85%-yn qamtamasyz etedi.
Al Dragomır Karıch – «Bratıa Karıch» kópsalaly holdınginiń teń quryltaıshysy ári teń ıesi. D.Karıch Qazaqstan-Serbııa qarym-qatynasyn nyǵaıtýǵa, ekijaqty saıası dıalog pen saýda-ekonomıkalyq ári ınvestısııalyq ózara is-qımyldy damytýǵa eleýli úles qosty. Sondaı-aq ol eki el arasyndaǵy parlamenttik baılanystardyń damýyna serpin berip, Qazaqstannyń oń ımıdjiniń qalyptasýyna yqpal etti. 2019 jyldyń qarasha aıynda «Prezıdenttik ınstıtýt: Qazaqstandyq model» halyqaralyq parlamenttik konferensııasyna qatysý úshin Serbııa Parlamenti depýtattarynyń delegasııasyn bastap keldi. Ol uzaq jyldar boıy Serbııa aýmaǵynda túrli mádenı is-sharalardy ótkizýge, sonyń ishinde qazaqstandyq ártister men shyǵarmashylyq ujymdardyń konserttik baǵdarlamalaryn uıymdastyrýǵa qoldaý kórsetti.