Soltústik Qazaqstan oblysy aýmaǵynda júrgizilip jatqan «Anti fraud» jedel-profılaktıkalyq sharasy arqyly bir kúnde 7 ınternet qylmyskeri áshkerelendi. Bul týraly oblystyq PD krımınaldyq polısııa basqarmasynyń bastyǵy, polkovnık Ivan Terzıdı habarlady.
«Veb-keńistikke monıtorıngti kúsheıttik. Bizdiń qyzmetkerler halyq arasyna keń taraǵan áleýmettik jelilerdegi saıttardyń habarlandyrýlary men pablıkteriniń ras-ótirigin tekserdi. Sonyń ishinde 10 saıttyq silteme quqyq buzýshylyq kontentter bolyp shyqty. Olardyń kóbi – halyqty aldaǵan feık habarlandyrýlar. Bul siltemelerdi buǵattaý úshin biz «Kıbernadzor» júıesine jiberdik. Sonymen qatar 6 ınternet alaıaqtyqty anyqtadyq. Onyń tórteýi – buryn jasalǵan alaıaqtyq qylmystar. Al bireýi urlyq jasaý arqyly jasalǵan. Kúdikti adam bireýdiń bank kartasyn urlap alyp, sonymen satyp alǵan taýarynyń qunyn tólegen», dedi ol.
I.Terzıdı bıyl 10 aıda Jastar resýrstyq ortalyǵynyń volonterlarymen birlesip alaıaqtyqtan saqtaný habarlaryn birneshe ret taratqanyn aıtty. Alaıda osy ýaqyt aralyǵynda 606 ınternet alaıaqtyq jasalǵan eken.
Aıta ketetin jaıt, halyqty aldaýdyń negizgi bóligi Instagram jelisi jáne OLX arqyly berilgen habarlandyrýlarǵa tıesili. Osy jyly mundaı 85 jaǵdaı bolǵan. Bul habarlandyrýlar birinshi aldanǵan adamnyń shaǵymynan keıin-aq buǵattalýy kerek edi. Biraq jedel buǵattaýdyń da ózindik olqylyqtary bar.
Krımınaldyq polısııa basqarmasynyń qyzmetkerleri alaıaqtyqtyń jańa túri shyǵyp jatqanyn da jarııalady. Ol alaıaqtardyń joǵary tehnologııalyq ádisterdi qoldanýy arqyly jasalady. Alaıaqtar qazir neırojúıeniń múmkindikterin paıdalanatyn bolypty. Jasandy ıntellekt arqyly adamnyń beınesi men daýsyn da aınytpaı túsirýdi ıgergen. Mundaı ádis qazir «dıfeık» degen ataý alǵan.
«Adamnyń beınesi men daýsyn dál keltirip, qylmyskerler onyń týystary men tanystaryna tezirek myna esepshotqa aqsha aýdarshy dep jalynyp, qaıyrylady. Tipti basyna bir is túsip qalǵanyn da aıta alady. Aýdarǵan aqshany tez arada qaıtaratynyn da aıtyp beredi. Týystarynan nemese jaqyn tanystarynan mundaı habar alǵan adam esh asyqpaı jaqyn adamyna habarlasýy kerek. Sóıtip, habardyń ótirik ekenine kóz jetkizedi», deıdi I.Terzıdı.
Alaıaqtar konkýrsta bireýge daýys berýdi ótinip jiberiletin habardy da óz qylmysyna paıdalanady eken. Máselen, meniń balama konkýrsta daýsyńdy bere qoıshy dep jibergen habarlamada «myna siltemege basyńyz» degendi oryndasańyz, olar osy arqyly vırýs jiberip, telefondaǵy barlyq aqparatty qolǵa túsire alady. Qazir krımınaldyq polısııa basqarmasy osy týraly rolık shyǵaryp, ony da «Anti fraud» jedel-profılaktıkalyq sharasynda qoldanyp júr.
Osy basqarmanyń qyzmetkerleri jýyrda oblystyq máslıhattyń depýtattarymen alaıaqtardyń sybaılasy bolyp, bank kartalaryn paıdalanýǵa beretin dropperlerdi qalaı jazalaýdyń joldaryn talqylady. Dropper bolyp ońaı aqsha tabýdan halyqty, sonyń ishinde jastardy saqtandyrý úshin zańnamany jetildirý qajettigi aıtyldy.
Soltústik Qazaqstan oblysy