Batys Qazaqstan oblysynyń Qaztalov aýdanynda 16 aýyldyq okrýg, úlkendi-kishili 47 eldi meken bar. Bıyl osy aýyldardyń basym kópshiliginde qurylys qyzý júrip jatyr.
Bul – halyqtyń ál-aýqatyn jaqsartý maqsatynda elimizde júzege asyp jatqan birqatar memlekettik baǵdarlamanyń nátıjesi. Aýyldaǵy aǵaıyn da osyndaı turǵyn úı baǵdarlamalarynyń ıgiligin kórip otyr. Máselen, tek Qaztalov aýdanynda ǵana bıyldyń ózinde 55 otbasy jańa baspanaǵa kirip, qonystoıyn toılady.
Memleket basshysy Qasym-Jomart Toqaev Atyraýda ótken Ulttyq quryltaıda: «Baspana – jurttyń turmys sapasyn tanytatyn taǵy bir mańyzdy kórsetkish. Bıyl 1 naýryzdan bastap iske qosylǵan «Otaý» ıpotekalyq baǵdarlamasy el ishinde úlken suranysqa ıe bolyp otyr. Buǵan qosa, aýyl jáne aýdan ortalyǵynyń turǵyndaryna arnalǵan jańa turǵyn úı baǵdarlamasyn qolǵa alý kerek. Bul rette áleýmettik turǵyda osal toptaǵy jandarǵa nesıe ósimi 7 paıyzdan aspaýy qajet. Sonymen qatar satyp alý quqyǵymen jalǵa beriletin baspana sanyn birneshe ese kóbeıtýdi Úkimetke tapsyramyn», degen edi.
Mine, Prezıdenttiń osy tapsyrmasyna sáıkes О́nerkásip jáne qurylys mınıstri 2023 jylǵy 22 jeltoqsanda «Respýblıkalyq bıýdjet esebinen turǵyn úı salýdy, satyp alýdy qarjylandyrý nemese memlekettik baǵaly qaǵazdar shyǵarý, turǵyn úıge muqtaj Qazaqstan Respýblıkasynyń azamattaryna turǵyn úıdi monıtorıngileý jáne ótkizý qaǵıdalary» týraly buıryq shyǵarǵan. Dál osy qaǵıdaǵa sáıkes bıyl Qaztalov aýdanynda halyqtyń áleýmettik osal toptaryn turǵyn úımen qamtý maqsatynda 142 turǵyn úıdiń qurylysy bastalǵan edi. Bul turǵyn úılerdi satyp alýǵa respýblıkalyq, oblystyq bıýdjet esebinen qarajat bólindi.
– Qazirgi tańda aýdanda salynyp jatqan 1 páterdiń quny – 15,5 mln teńge. Aýyldaǵy eki páterli turǵyn úı 31,0 mln teńgege shyǵady. Bizdiń Qaztalov aýdanynda turǵyn úı salýǵa 46 jeke ınvestor tartylǵan. Qazir 28 eldi mekende qurylys jumysy júrip jatyr. Qurylys sapasyn baqylaý maqsatynda barlyq aýyldyq okrýgte óndiristik jumys kestesi bekitilgen. Jergilikti qoǵam ókilderi arnaıy jumys tobyn quryp, qurylys barysyn qadaǵalap otyr. Jańa úıler qazirgi zaman talabyna saı. Jumysty negizinen jergilikti ınvestorlar men mamandar atqaryp jatyr. Jalpy, jospar boıynsha aýdanda 28 eldi mekende 76 turǵyn úı, 142 páter salýymyz kerek, deıdi aýdan ákimi Aslanbek Sarqulov.
Aýylda, shalǵaı eldi mekenderde jańa turǵyn úılerdiń salynýy – memlekettiń aýylǵa kóńil bólip otyrǵanynyń aıqyn kórinisi. Baspanaly bolǵan aýyldyqtardyń qýanyshynda shek joq.
– Jańa úıler aýyldyń tynysyn asha túskendeı. Bir jaǵynan aýyl jańaryp, ajary kiredi, ekinshi jaǵynan aýylymyz ósedi, keńeıedi. Aýdan ákimderi halyqpen kezdeskende jıi aıtylatyn máseleniń biri osy – baspana. Sońǵy kezderi bul da sheshimin taýyp, halyqtyń qýanyshy eselenip otyr. Qazir memlekettik baǵdarlama arqyly salynǵan úıler aýyldaǵy aǵaıynǵa dem berip, jeke turǵyn úılerdiń de kelbeti kelisken jaıy bar, dedi Qaztalov aýylynyń turǵyny Marat Toıasov.
Al Jańatań eldi mekenindegi kópbalaly Sısenovter áýleti baspana kiltin oblys ákimi Narıman Tóreǵalıulynyń óz qolynan aldy.
– Qazir shekaralyq aımaqtarǵa, aýyldar men eldi mekenderge erekshe nazar aýdarylyp, birqatar joba júzege asyp jatyr. Sonyń biri – «Qaladan – aýylǵa» óńirlik baǵdarlamasy. Osy baǵdarlama arqyly Qaztalov aýdanynyń Jańatań eldi mekenine kóship kelgen alǵashqy otbasymyz. Bizge kelgen boıda ýaqytsha turǵyn úı berildi. Qoramyzǵa mal kirdi. Qazir sol tórt túliktiń ıgiligin kórip otyrmyz. Turaqty jumysqa da ornalastyq. О́zeginen teppeı, qushaq jaıa qarsy alǵan aýyl halqyna alǵysymyz sheksiz. Osy oraıda oblys, aýdan basshylyǵyna halyqtyń ál-aýqatyn arttyrý maqsatynda ıgi jobany júzege asyryp, kórsetken qoldaýyna razylyǵymyzdy bildiremin, deıdi Aıat Sısenov.
Jaqynda Májiliste 2025–2027 jyldarǵa arnalǵan úsh jyldyq bıýdjet talqylanǵany, sonyń ishinde Batys Qazaqstan oblysynyń ınjenerlik, kólik jáne áleýmettik ınfraqurylymyn damytýǵa qosymsha 1,978 mlrd teńge qarajat bólingeni habarlanǵan edi. Mine, osy qarjynyń basym bóligi de Qaztalov aýdanyndaǵy Bolashaq, Qaztalov, Qaraoba, Qoshankól aýyldarynyń ishki joldaryn jańǵyrtýǵa jumsalǵaly otyr.
«Astanaǵa arnaıy kelip, óz aýdanyna qatysty jobalardyń qajettiligin dáleldep, osyndaı qarjynyń bólinýine yqpal etken Qaztalov, Jánibek, Bókeıordasy aýdandarynyń ákimderiniń belsendiligin atap óter edim. О́ıtkeni bıýdjetti qorǵaý barysynda atqarýshy organ ókilderiniń depýtattarmen birge bolýy óte mańyzdy», deıdi Májilis depýtaty Abzal Quspan.
Osy jańalyqty estigeli aldaǵy jyldary da Qaztalov aýdanynyń eldi mekenderi jańǵyryp, jaınaı túsetinine senip otyrmyz.
Batys Qazaqstan oblysy