Oqýshy qyz ben onyń anasyn aıýandyqpen óltirgen eks-muǵalimniń soty qalaı ótetini belgili boldy. Túrkistan oblystyq soty is ashyq ótetinin málimdedi, dep habarlaıdy Egemen.kz.
Otyrar.kz dereginshe, qylmystyq is alqabılerdiń qatysýymen qaralady. Alqabıler tańdalyp ta qoıǵan.
Aıta keteıik, er adamǵa úsh birdeı qylmystyq bap boıynsha aıyp taǵylyp otyr.
- Is materıaldaryna sáıkes, sotqa deıingi tergep-tekserý organdary sottalýshyǵa «Qylmysqa daıyndalý jáne qylmysqa oqtalý» (QK 24-baby 3-bóligi), «Kámeletke tolmaǵan adamdy zorlaý» (QK 120-baby 3-1-bóligi 1-tarmaǵy), «Eki nemese odan kóp adamdy óltirý» (QK 99-baby 2-bóligi 1, 3, 10, 14-tarmaqtary) qylmystyq áreketteri boıynsha aıyp taǵyp, sotqa joldaǵan. Sottalýshynyń ótinish haty boıynsha is alqabılerdiń qatysýymen ashyq sot otyrysynda qaralady, - dep habarlady Túrkistan oblystyq sotynyń baspasóz qyzmeti.
Eske salaıyq, 12 qyrkúıek kúni Keles aýdanynda jantúrshigerlik qylmys bolǵan edi. Mańaıda turatyn aýyl turǵyny shyrt uıqyda jatqan 46 jastaǵy áıel men onyń 15 jastaǵy qyzyn óltirip ketken. Jelide taraǵan aqparat boıynsha, kúdikti muǵalim bolyp qyzmet atqaryp júrip oqýshy qyzǵa tıisken. Muny bilgen anasy pedagogtyń ústinen aryz túsirgen, keıin jumystan qýylǵan.