Psıhologtardyń aıtýynsha, qurmetti demalystan keıingi ýaqyt – adamnyń ózi úshin ómir súretin eń ádemi kezeńi. Qyzmet babymen júrip ekinshi, bálkim úshinshi, tórtinshi orynǵa ysyrylyp qalǵan arman-qııaldaryn adam zeınetke shyqqannan keıin joǵaltpaı júzege asyra alsa – ol ómiri maǵynaly naǵyz baqytty adam. Sózimizge dálel retinde Astana qalasynda ornalasqan «Belsendi uzaq ómir súrý ortalyǵynyń» atalary men ájelerin aıtýǵa bolady. Kúni keshe osy qazynaly qarııalar «Egemen Qazaqstan» gazeti redaksııasyna qonaqqa kelip, jýrnalıstermen kezdesip, jumys barysymen tanysty. Kezdesýdi «Qazaq gazetteri» JShS dırektorynyń orynbasary Qambar Ahmet júrgizdi, dep habarlaıdy Egemen.kz.
Ortalyq zeınetkerlerdi mádenı, sporttyq jáne iskerlik ómirge áleýmettendirý maqsatynda qurylǵan. Onyń ishinde túrli baǵyttaǵy úıirmeler men seksııalar bar. Atap aıtsaq, jattyǵý zaly, kompıýterlik synyp, vokal, shyǵarmashylyq sheberlikpen aınalysýǵa arnalǵan bólmeler jabdyqtalǵan. Qarııalar qabiletine qaraı mýzykamen, til úırenýmen, bımen jáne qolónermen aınalysady. Sonymen qatar ortalyq múshelerine kompıýterlik saýattylyqty oqytý kýrstary da qarastyrylǵan.
Bul týraly ortalyqtyń «Ulaǵat» atty ádebı-mádenı úıirmesiniń jetekshisi Lázzat Dúısenbaıqyzy baıandap berdi.
«Ortalyqta zeınetkerlerdiń jan-jaqty damýyna barlyq jaǵdaı qarastyrylǵan. Qarııalarymyz bilim alyp, óner úırenip qoǵamdyq ómirge belsene atsalysyp jatyr. Tipti zaman men turmystyń yqpalynan damytýǵa múmkin bolmaǵan keı qabiletterin osynda kelip shyńdap, birshama nátıjege jetip-te qaldy. Máselen, dombyrany ortalyqqa kelip úırengen zeınetkerler «Asyl mura» orkestri bolyp uıymdasyp, kúni keshe Almatyda ótken «О́nerli eldiń órisi bıik» respýblıkalyq ata-apalar arasyndaǵy óner saıysynda bas júldeni jeńip aldy», dedi L. Dúısenbaıqyzy.
Sonymen qatar qarııalar «Egemen Qazaqstan» gazetiniń oqyrmandary ekenin aıtyp, jýrnalısterge izgi iltıpatyn jetkizdi. Bas redaktordyń orynbasary Talǵat Batyrhan adamǵa ómirdiń ár sáti sáýleli, ózinshe qymbat ekenin aıtyp, jazýshy Tólen Ábdiktiń sózin mysal etti.
«Men bir nárseni túsinbeımin. Keı zamandastarym qazirgi kúnimdi jıyrma besime oılanbastan aıyrbastar edim dep qııaldap otyrady. Al men olaı aıta almaımyn. Men jıyrma besime qaıta oralsam, bul degen qazirgi baldaı tátti nemerelerimnen bas tartý degen sóz ǵoı», deıdi eken aqsaqal aǵamyz. Sondyqtan tórimizge qonaq bolyp kelip otyrǵan qurmetti qarııalar, sizder óte ádemi ýaqytty bastan keshirip jatsyzdar. Osy jastaǵy qyzyqtaryńyz qazirge deıin kórgen qyzyqtaryńyzdan kóp bolsyn», dep tilek bildirdi T. Batyrhan.
Kezdesý sońynda dırektordyń orynbasary Qambar Ahmet qarııalarǵa alǵysyn aıtyp, redaksııanyń atynan arnaýly syılyqtar tabys etti.