Pavlodar oblysynyń ótken 10 aıdaǵy ósý-damý qarqyny kóńil toǵaıtarlyq. Oblys shıkizat óndirisine ǵana súıenbeı, ártaraptandyrý úderisteri arqyly qýatty óńdeý salasy bar jáne aýyl sharýashylyǵy damyp jatqan aımaqqa aınalyp keledi.
Oblysta ónerkásip óndirisiniń kólemi 2,8 trln teńgege nemese 3,6%-ǵa jetip, al óńdeý sektory 8,2%-ǵa ósken. Bıyl óńirge 815 mlrd teńgege jýyq ınvestısııa tartylypty. Bul ótken jylǵy kórsetkishten 30% joǵary. Oblys jalpy ınvestısııa tartý jóninen respýblıkada 2-orynda bolǵanymen, agrarlyq sektorǵa salynǵan ınvestısııa kólemine kóz salsaq, óńirler arasynda kósh bastap tur. Onda 88%-y jeke kompanııalardyń ınvestısııasy. Bul aımaqta qolaıly ınvestısııalyq klımattyń qalyptasqanyn kórsetedi. Jalpy, 2,8 trln teńgege 140 ınvestısııalyq jobanyń pýly bar. Ol 10 myńnan astam jańa jumys ornyn qurýǵa múmkindik berdi. Áıtse de, ónerkásiptiń ósýi óńirdegi ekologııalyq jaǵdaıǵa qysym jasap jatqany málim. Sondyqtan oblys basshylyǵy ındýstrııalandyrý serpinin saqtaı otyryp, shyǵaryndylardy tejeý jáne kezeń-kezeńimen azaıtý mindetin alǵa qoıǵan. Jumys istep turǵan barlyq iri ónerkásiptik kásiporynda keshendi ekologııalyq sheshim engizý arqyly salynyp jatqan nemese josparlanǵan zaýyttarda sońǵy ecofriendly tehnologııalaryn qoldanýdy qatań talap etip otyr.
Ekologııany saqtaýdaǵy mańyzdy baǵyt – kommýnaldyq qaldyqtardy basqarý jumysy. Bul maqsatqa jetýge plastık, metall, qaǵaz jáne shyny shyǵaratyn alǵashqy zamanaýı qoqys suryptaý kesheniniń qurylysy kómektesedi.
«Búginde bizdiń óńir agrarlyq salaǵa tartylǵan ınvestısııa kólemi boıynsha elimizde kósh bastady. Qańtar aıynan bastap agrobızneske 190 mlrd teńgeden asa ınvestısııa salyndy. Bul ótken jyl kórsetkishinen eki esege joǵary», dedi Ortalyq kommýnıkasııalar qyzmetinde ótken brıfıngte Pavlodar oblysynyń ákimi Asaıyn Baıhanov.
Bıyl óńirde eldi mekenderdiń kóshelerin jóndeýdi qosa alǵanda, respýblıkalyq mańyzy bar 46,5 shaqyrym jáne jergilikti mańyzy bar 616 km jol jóndeldi. Oblys ortalyǵynda Ertis ózeni arqyly ótetin jańa kópirdiń qurylysy bastaldy. Jobany 2027 jyly aıaqtaý josparlanǵan. Kelesi jyly 16,5 mlrd teńgege 325 shaqyrym jergilikti mańyzy bar joldar men eldi mekenderdiń kóshelerin jóndeý, onyń qatarynda topyraq jamylǵysy bar 31 aýyldyń kirme joldaryn salý mindeti tur.
Infografıkany jasaǵan – Amangeldi Qııas, «EQ»
Aımaq bıylǵy jıyn-terim naýqanynda astyqtyń rekordtyq kólemin jınady. Dıqandar 1,1 mln tonnaǵa jýyq astyq bastyrdy, bul ótken jylǵy ónimnen 3 ese kóp. Keshendi memlekettik qoldaýdyń arqasynda sýarmaly egis alqaptary 12,7 myń ga ulǵaıyp, 179 myń ga jetken. Sýarmaly alqaptarǵa 100% ylǵal únemdeıtin tehnologııalar, ıaǵnı dıspersııalyq sýarý tásili nemese jańbyrlatyp sýarý ádisi qoldanylady.
Sońǵy málimetterge zer salsaq, óńirdegi azyq-túlik taýarlarynyń baǵasy 16 ustanymda ortasha respýblıkalyq mánnen tómen. Al 8 ustanymda oblys eń tómen baǵamen TOP-5 óńirdiń qatarynda tur. Sondaı-aq oblys jumyssyzdyqtyń salystyrmaly tómen deńgeıin, ıaǵnı 4,7%-dan aspaıtyn kórsetkishin ustap tura aldy. Oǵan 26,2 myń jańa jumys ornyn qurý yqpal etti. Onyń 73,6%-y turaqty jumys oryndary.
Prezıdenttiń densaýlyqty saqtaý men áleýmettik salany qarjylandyrý tásilderin qaıta qaraý tapsyrmasyna sáıkes óńirde oblystyq bıýdjettiń 52%-y áleýmettik salaǵa baǵyttalǵan.
«О́ńirde balalardyń qosymsha bilim alýyna jáne olardyń bos ýaqytyn uıymdastyrýǵa kóp kóńil bólinedi. Jaqynda 2 jańa balalar shyǵarmashylyq ortalyǵy ashyldy. Sondaı-aq taǵy bir «Samǵaý» balalar shyǵarmashylyq ortalyǵy Ekibastuz qalasynda ashylady. Jańa áleýmettik nysandardy sala otyryp, jumys istep turǵan mekemelerdiń jumysqa qabilettiligin saqtaý máselesin umytqan joqpyz. 11,5 mlrd teńgege 73 áleýmettik nysandy jóndeýden ótkizdik jáne 4,9 mlrd teńgege 35 jańa áleýmettik nysan salynyp jatyr», dedi oblys ákimi.
Pavlodarda oqýshy oryny tapshylyǵyn azaıtý úshin 1 200 jáne 600 oryndyq eki «Jaıly» mekteptiń qurylysy júrgizilip jatyr. Olardyń qurylysyn kelesi jyldyń naýryz aıynda aıaqtaý josparlanǵan.
Oblystaǵy ınjenerlik ınfraqurylymdar aıtarlyqtaı tozǵany belgili. Bul máseleni sheshý, jelilerdi jańartý men energııa kózderin damytý jobalary sala mamandarynyń kúndelikti jumysy. Jyldaǵy jóndeý naýqany 3 qalanyń táýelsiz jylý-tehnıkalyq aýdıtiniń qorytyndysy jáne júrgizilip jatqan gıdravlıkalyq synaqtardyń negizinde uıymdastyrylady.
Bıylǵy jylý berý maýsymyna daıyndyq úshin 25 mlrd teńgege 31 shaqyrymnan astam jylý jelilerin salý, qaıta qurý jáne jóndeý boıynsha jumys júrgizildi. Uzaqtyǵy 9 km bolatyn 4 jańa jylý magıstrali salyndy. Oǵan qosa 19,3 shaqyrym jeli jóndeýden ótti.
«Sýmen jabdyqtaý jáne sý burý júıeleriniń qurylysyn belsendi júrgizip jatyrmyz. Bul salada 16,4 mlrd teńgege 18 joba iske asyryldy. Al bizdegi qalalar jaılylyǵynyń negizgi faktorynyń biri – qoǵamdyq kólik júıesiniń damýy. Qazirdiń ózinde osy salada belgili bir nátıjege qol jetti. Ony qala turǵyndary oń baǵalady. Taıaýda Eýropalyq qaıta qurý jáne damý bankimen 25 jańa tramvaı vagonyn satyp alý týraly bas kelisimge qol qoıyldy. Olardyń alǵashqy legi kelesi jyldyń birinshi jartyjyldyǵynda keledi», dedi A.Baıhanov.
Sonymen qatar el Prezıdentiniń bastamasymen oblysta júzege asyrylyp jatqan «Aýyl – el besigi» jobasynyń arqasynda aýyldyq ınfraqurylymdy jańartý boıynsha úlken jumys júrgizilip jatyr. 18 myńǵa jýyq turǵyny bar 15 aýyl jańǵyrtylyp 57 nysandy jańartýǵa 9,2 mlrd teńge baǵyttaldy.
Osy jyldyń 10 aıynda 296 myń sharshy metrden astam turǵyn úı paıdalanýǵa berildi. Muny ótken jylmen salystyrǵanda 27%-ǵa artyq. Aldaǵy jeltoqsan aıynda halyqtyń áleýmettik osal toptary sanatynda kezekte turǵandar úshin 331 páterdi jalǵa beriletin turǵyn úı túrinde satyp alý josparlanǵan. Sondaı-aq úsh qalada 146, jalpy oblystyń 10 aýdanynda 185 páterdiń kilti ıesine beriledi. О́zin-ózi jumyspen qamtýdy óristetý maqsatynda halyqtyń áleýmettik osal tobynan shyqqan ókilderge 653 mln teńge somasyna 442 grant berildi.
О́ńir basshysy qoǵamdyq kólik júıesiniń damýy týraly egjeı-tegjeıli baıandady. Keıingi eki jylda óńirde 218 avtobýs jańarypty. Búginde Pavlodar, Ekibastuz qalalary 75% zamanaýı joǵary klasty avtobýstarǵa ıe kórinedi. Jyl sońyna deıin jańa avtobýstardyń sany 250-ge deıin jetkiziledi. Al ótken qyrkúıek aıynda Pavlodar áýejaıynyń ushý-qoný jolaǵyn qaıta jańartý jumysy bastaldy. Ol qurylys kelesi jyldyń qazan aıynda aıaqtalady. Demeýshilik qarajat esebinen Pavlodar temirjol vokzaly da jańartylyp jatyr. Al Ekibastuz vokzalyn jańǵyrtý jumysy aldaǵy kóktemniń alǵashqy aıynda aıaqtalady.