Ulttyq akademııalyq kitaphanada Alash arystary Ahmet Baıtursynuly men Maǵjan Jumabaev murasyna arnalǵan «Alash muraty – túrki birligi» atty is-shara uıymdastyrylyp, M.Áýezov atyndaǵy Ádebıet jáne óner ınstıtýty daıyndap, halyqaralyq Túrki akademııasynyń qoldaýymen jaryq kórgen qos arystyń akademııalyq shyǵarmalar jınaǵynyń tanystyrylymy ótti.
Mártebeli basqosýǵa Túrki akademııasynyń prezı-denti Shahın Mustafaev, Ádebıet jáne óner ınstıtýty bas dırektorynyń orynbasary Elmıra Omarova, senator Darhan Qydyráli, Serik Negımov, Ádil Ahmetov, Saýytbek Abdrahmanov syndy zııaly qaýym ókilderi qatysty.
Halyqaralyq Túrki akademııasynyń basshysy Shahın Mustafaev myrza is-sharanyń mańyzyna toqtalyp, Alash arystary Ahmet Baıtursynuly men Maǵjan Jumabaevtyń túrki álemine sińirgen eńbegin atap ótti.
«Ahmet Baıtursynuly qazaq til biliminiń negizin qalaýshy jáne álipbı reformatory retinde túrki dúnıesiniń rýhanı damýyna baǵa jetpes úles qosty. Onyń ortaq túrki termınologııasy men ádebı tildi qalyptastyrý týraly ıdeıalary búginde ózektiligin joǵaltqan joq. Al Maǵjan Jumabaev óziniń shyǵarmashylyǵymen túrkilik sanany oıatyp, túrki áleminiń birligin dáriptegen uly tulǵa. Onyń «Alystaǵy baýyryma» sııaqty óleńderi – baýyrlas halyqtar yntymaǵynyń jarqyn úlgisi», dedi halyqaralyq Túrki akademııasynyń basshysy.
Sonymen qatar Shahın Mustafaev Alash qaıratkerleri kóregendikpen sengen Túrkistan ıdeıasynyń táýelsiz túrki memleketteriniń ıntegrasııasy dáýirinde de óz mańyzyn saqtap otyrǵanyn atap ótti. Ol bıyl qyrkúıek aıynda qabyldanǵan Ortaq túrki álipbıin Ahmet Baıtursynuly men túrki áleminiń basqa da uly aǵartýshylarynyń asyl murattarynyń oryndalýy retinde baǵalap, mártebe sanaıtynyn jetkizdi.
Túrki akademııasynyń bas bolýymen, «HIH ǵasyr men HH ǵasyrdyń basyndaǵy túrki aǵartýshylyǵy: zııalylardyń ómiri men ıdeıalary» jobasy aıasynda ulttyń órkendeýine qyzmet etken oıshyldardyń ómirbaıandary men ıdeıalary jınaqtalyp jatyr. Atap aıtsaq, kelesi jyly Shoqan Ýálıhanovtyń 190 jyldyǵyna oraı onyń tańdaýly eńbekterin aýdaryp, túrik oqyrmandaryna usynýdy josparlap otyrǵan kórinedi. Taǵy biri – «Túrki áleminiń tuǵyrly tulǵalary» atty joba. «Bul jobanyń mańyzdylyǵy, jas urpaqty ortaq qundylyqtardy qurmetteýge tárbıeleý», deıdi atqarýshy tarap.
Is-shara sońynda M.Áýezov atyndaǵy Ádebıet jáne óner ınstıtýtynyń ókili mekeme atynan Túrki akademııasynyń prezıdentine alǵys hat tabystap, uly tulǵalar murasyn zertteýge qosqan úlesi úshin rızashylyǵyn bildirdi.