Seksen kóldi omyraýyna seksen monshaq etip taqqan kórikti Kókshe qysy da ǵajap! Bıik kókten bılep oınap jaýǵan qar máńgi jasyl qaraǵaıdyń ushar basyna qonaqtap, saı-salany toltyryp, saf aýa tazara túskendeı.
Kúzdiń zerli shapanyn sypyryp tastap, aq tonyn kıgen aımaq syrbaz sulýlyǵymen kóz qaryqtyrady. Taza aýada shyny muzdyń naq ortasyndaǵy Jumbaqtastyń jumbaq syry qalyńdaı túskendeı. It tumsyǵy ótpeıtin orman-toǵaı, quzar jartas kórkem keıipke engen. Býrabaı men Zerendiniń kýrortty aımaǵy qysqy demalysty unatatyn qyrýar halyqty qushaq jaıyp qarsy almaq, qur atqa mingendeı shynyqtyryp, kókiregine rýhanı nár syılap attandyrmaq. Kúmis kólder shyńyltyr muzben kómkerilip, jalaýly jasyl dúnıe jazdyń janǵa rahat sáti saıabyrlaǵanymen, aýasy shań-tozańnan arylyp, súzgiden ótkendeı tazara túsken. Kýrortty aımaqtaǵy mekemeler ekotýrızmdi damytpaq. San túrli sporttyq sharalar uıymdastyrylmaq. Eń bastysy, adam aǵzasyna tyń kúsh, sony serpin beretin saýyqtyrý baǵdarlamalary kóp-aq. Kirpııaz meımandardy qabaq shyttyrmaı qarsy alyp, bar jaǵdaıyn jasamaq. «Oqjetpes», «Almaz», «Shýchınskıı», «Terrassa Park», «Samal», «Dıskaverı Borovoe», «Grand Prıks», «Zeren» tárizdi sanatorııler qyzmet etpek.
Bir aıta keterligi, ýaqyt ótken saıyn týrızmdi tegeýrindi damytýǵa meılinshe mán berilip otyr. Onyń ishinde qaıyńdy, qaraǵaıly ormandy alańsyz aralap, qoltyǵyńyz sógilip shańǵy tebýińizge ábden bolady. Kıeli jerdiń ańyzben ajarlanǵan alqaptaryna, shoqylar men yldılardy boılap, shańǵy joly salynǵan. Týrısterdiń qaýipsizdigi de qatań eskerilgen. Konkı teýip, shanamen syrǵanaımyn deseńiz, qalaýyńyz bilsin. Kásibı shańǵy sportymen aınalysatyndarǵa da bar múmkindik týdyrylǵan. Mundaı shańǵy joly Býrabaı baýraıynda da, zerli Zerendide de bar. Tipti qaýip-qaterge toly shytyrman jol, shyrǵalańy mol kezeńder de týrısterdi tosyp tur. Bul jol adamnyń boıyndaǵy, alpys eki tamyryndaǵy qandy oınatyp, esten ketpes qyzyq syılamaq.
Jyl saıynǵy jattandy kórinisten ada, jańa zamannyń talabyna tolyq jaýap beretin «Býrabaı Lend» oıyn-saýyq parki jeltoqsan aıynyń orta sheninde shartaraptan keletin týrısterge esigin aıqara ashpaq. Jyldyń basty jańalyǵy da osy. Bul jerde ıt shanalarmen aqsha qardyń ústinde syrǵanap, qutty qııandaǵy Sibirdiń bir shetinde júrgendeı áser alasyz. Atqa minip, qydyrýǵa da bolady. Ár jastyń ereksheligi eskerilgen. Balalardyń boıyna, oıyna laıyqtalǵan alańdary bar. Al eresekterdiń ár belesi, ár tóbesi ańyzǵa tunǵan kýrortty aımaqtyń kórgen kózdi súısindiretin alqaptaryn aralap, baǵzy zamannyń el jadynda jattalyp qalǵan esteligimen tanysýyna tolyq múmkindik bar. Aıtpaqshy, qııalqumar kishkentaılarǵa arnalǵan Santanyń rezıdensııasy jumys isteıdi.
Osyndaı kórkem dúnıe qyzyqtyrmaı qoıa ma? Kórikti Kóksheniń qysyn tamashalaýǵa, tylsym tabıǵat aıasynda demalýǵa keletinder sany jyl saıyn óse túsip otyr. Bir ǵana mysal keltirelik, «Býrabaı Lend» parki árbir qysqy maýsymda elý myńnan astam týrıstke qyzmet etedi. Taǵy bir aıta keterligi, dúmep keletin qonaqtar jolda beınet kórmesin dep jeltoqsannyń 10-ynan bastap «Astana-Býrabaı» jańa jyldyq vagony qatynaıtyn bolady. Bul da jaǵymdy jańalyq sanatynda.
Shýche qalasyndaǵy olımpıadalyq oıyndarǵa daıyndyq ortalyǵynda halyqaralyq jarystar uıymdastyrylady. Kásibı shańǵyshylar baıraqty básekege túsetin iri jarystardyń jıyrmaǵa jýyǵy ótkiziledi dep josparlanyp otyr. Juldyzsha aqqan erjúrek shańǵyshylardyń minsiz sýretteı shalt qımyly men qarshyǵasha quldılaıtyn kórinisin tamashalaǵysy kelgender ókinbesi anyq. Elimizdiń shańǵy týrızmi ashyq chempıonaty men týrıstik kópsaıys jarysy ótkiziledi. Jalǵyz tabıǵatty ǵana emes, sportty serik etken aǵaıynǵa bul da qyzyq bolýǵa tıis.
Qarap otyrsańyz, qyzyǵy mol qysqy týrızmniń jóni bólek. Endeshe, kórikti ólkeniń qysqy demimen, qyzyqty lebimen tanysqyńyz kelse, at basyn bura ketińiz!
Aqmola oblysy