Elordada turǵyndardy mekenjaı boıynsha tirkeý tártibi ózgeredi, dep habarlaıdy Egemen.kz «Habar» arnasyna silteme jasap.
Mamandardyń aıtýynsha, elordada 35 sharshy metrge 625 adamdy tirkegen «rezeńke páterler» anyqtalǵan.
«Astanada adamdardy turǵylyqty jáne ýaqytsha mekenjaı boıynsha tirkeýge qatysty zańnamaǵa ózgerister engizý qarastyrylyp jatyr. Eger ol qabyldansa, onda budan bylaı bir úıge júzdegen azamatty esepke qoıý múmkin bolmaıdy. Mundaı talap respýblıkalyq mańyzdaǵy ózge de qalalarda qoldanylmaq. «Bul tirkeý tártibin retke keltirip, iri shaharlardyń damý josparyn naqty túzý úshin qajet», deıdi mamandar.
Jyl basynan beri Astanada ondaǵan azamat tirkelgen 35 páter anyqtalǵan. Osy zańsyzdyǵy úshin olardyń ıelerine salynǵan aıyppul kólemi mıllıon teńgeden asady. Al 35 sharshy metrlik baspanasyna 625 adamdy tirkegen elordalyq turǵynǵa qatysty qazir qylmystyq is júrip jatyr.
«Bir páterde tirkelgen adam sany 20-dan assa, biz ony «rezeńke páter» dep esepteımiz. Tekserý barysynda bir páterde 100 adamǵa deıin tirkelgen faktiler kezdesti. Olardyń barlyǵyn ákimshilik jaýapkershilikke tarttyq. Menshik ıelerin halyqqa qyzmet kórsetý ortalyqtaryna aparyp nemese ózderiniń elektrondyq sıfrlyq qoltańbasy arqyly tirkeýden shyǵardyq. Qazirgi tańda Astana qalasy boıynsha 8 rezeńke páter qaldy. Olarda 623 adamdaı tirkelip tur. Qazir osy másele QR Parlamenti Májilisiniń qaraýynda», deıdi qalalyq PD kóshi-qon qyzmeti basqarmasy bastyǵynyń orynbasary Qanaı Jumabekov.
Kóp adamnyń bir úıde tirkelý derekteri úlken qalalarda jıi anyqtala bastaǵan. Sebebi túsinikti de. Jumys pen tabys kózin izdegen turǵyndar iri shaharlarǵa aǵylady. Ári qoldanystaǵy zańda bir páterge naqty qansha adamdy tirkeýge bolatyny rettelmegen. Sondyqtan bul rette tártipti qamtamasyz etý úshin tıisti zańnamaǵa ózgerister engizilmekshi.
«Astana qalasy, Almaty, Shymkent qalalaryna aýyldyq jerden kóship kelip jatqan azamattar bar. Zań boıynsha olar kelgennen keıin quzyrly organdarǵa baryp tirkelýge mindetti. Sebebi kúndelikti tirshilikte balabaqsha, mektep, emhana sekildi áleýmettik mekemelerdiń qyzmetin paıdalanady. Sondyqtan zańdy oryndaý árbir azamattyń paryzy», deıdi qalalyq qoǵamdyq keńestiń múshesi Tólegen Qýanyshev.
Mamandardyń aıtýynsha, azamattardy turǵylyqty jáne ýaqytsha mekenjaı boıynsha tirkeý máselesin retke keltirip, naqty usynystar daıyndaý úshin birneshe mınıstrlik ókilderi at salysatyn bolady. Tipti bolashaqta tıisti erejeni bekitý máslıhattardyń da qaraýyna berilýi múmkin. Astana qalalyq máslıhatynyń depýtaty Nurlan О́teshov mundaı jańashyldyq bola qalsa, áriptesterimen birge talqylaýǵa daıyn. Sebebi elordada azamattardy tirkeý máselesin birizdilikke túsirý qajet dep sanaıdy.
«Keıbir 50 sharshy metrlik páterge júzdegen adamdar tirkelgeni belgili bolyp jatyr. Bul máseleni bir izge salý kerek. Eń aldymen jergilikti bılik óz jaǵdaıyna qarap, óz standarttaryna qaraı qabyldaýy qajet», dep atap ótti Astana qalalyq máslıhatynyń depýtaty Nurlan О́teshov
Azamattardy turǵylyqty jáne ýaqytsha mekenjaı boıynsha tirkeýge qatysty zańnama áli talqylaný ústinde. Naqty qandaı ózgerister bolatyny aldaǵy ýaqytta belgili bolmaq. Bir anyǵy, úıge tirkelgen ár adamǵa naqty aýmaq belgilenedi. Biraq ol norma otbasy múshelerine qoldanylmaıdy. Al páterde turmaıtyn azamattardy tirkeýden shyǵarmaǵany úshin úı ıesine salynatyn aıyppul 2 esege óspekshi. Qazir onyń kólemi 10 aılyq eseptik kórsetkishti quraıdy.