«Qazaqkonsert» solısi Áıgerim Altynbek Italııada ótken opera ánshileri arasyndaǵy halyqaralyq baıqaýdyń jeńimpazy atandy. Kompozıtor Djakomo Pýchchınıdiń 100 jyldyǵyna oraı uıymdastyrylǵan baıqaýǵa álemniń ár túkpirinen, sonyń ishinde Qazaqstan, Japonııa, Qytaı, Koreıa, Reseı, Iran elderinen 70 ónerpaz qatysty.
Marapattaý rásimi Arkoredegi bedeldi Borromeo vıllasynda ótti. Áıgerim fınalıster arasynda úzdik dep tanylyp, Arkore mýnısıpalıtetiniń stıpendııasyn, sondaı-aq 2025 jyly Italııada ótetin aýqymdy konsertke qatysý quqyn jeńip aldy.
О́nerpaz Modena qalasynda ótken Nıkolaı Gıaýrov atyndaǵy opera ánshileriniń halyqaralyq baıqaýynda da úshinshi oryndy ıelendi. Otandasymyz Italııanyń áıgili opera ánshisi Mırella Frenıdiń arnaıy syılyǵyna ıe bolyp, Bolgarııanyń Varna qalasyndaǵy teatrda «Sestra Andjelıka» operasyndaǵy róldi oryndaý quqyna ıe boldy. Osylaısha, óner ıesi álemdik sahnalardaǵy jetistikterimen tyńdarmanyn qýantyp júr.
Áıgerim Altynbek Qazaq ulttyq óner ýnıversıtetin «Vokal óneri» mamandyǵy boıynsha dosent Tatıana Nıkolaevna Rýdneva synybyn támamdaǵan. Opera ánshisi birneshe ret halyqaralyq (Italııa, Fınlıandııa, Lıtva, Reseı, Germanııa, t.b.) jáne respýblıkalyq baıqaýlardyń laýreaty atanǵan.