Alkogoldi ishimdik iship, kólik tizgindegenderge zań qatań. Dese de, tártipke baǵynbaıtyn, ishimdikke sylqııa toıyp, rýlde aǵyndaıtyndar qatary azaımaı tur. Aınaldyrǵan úsh kúnniń ishinde oblys polıseıleri 20-dan asa júrgizýshiniń masań kúıde kólik basqarǵanyn anyqtaǵan.
Naqtyraq aıtsaq, úsh kúnniń ishinde ishimdik iship, kólik basqarýdyń 24 faktisi belgili boldy. Keıbir tártip buzýshylar óz kinásin moıyndasa, endi biri jaýapkershilikten qutylýǵa tyrysqan. Olar óz ómirin ǵana emes, ózgeniń ómirine de qaýip tóndiretinin eskersek, zańdy qalaı kúsheıtse de oryndy.
Mas kúıde kólik quraldaryn basqarǵan júrgizýshiler ákimshilik jaýapkershilikke tartyldy. Polısııa qyzmetkerleriniń aıtýynsha, olardy júrgizýshi kýáliginen 7 jylǵa deıin aıyrý, sondaı-aq 15 táýlikke deıingi merzimge ákimshilik qamaýǵa alý jazasy kútip tur.
Tekserilgen júrgizýshiler arasynda úsh azamat buryn osyndaı quqyq buzýshylyq jasaǵany úshin jaýapqa tartylǵan da eken. Endigi jaǵdaıda olar qylmystyq jaýapkershilikke tartylady. Bul rette 5 jylǵa deıin bas bostandyǵynan aıyrý jazasy kesilýi múmkin.
Statıstıkalyq derekterge úńilsek, jyl basynan beri tártip saqshylary mas kúıde kólik júrgizgen myńnan asa júrgizýshini toqtatyp, zańǵa tartqan.
ShQO PD mas kúıde kólik júrgizý júrgizýshilerdiń ózderiniń ǵana emes, jol qozǵalysynyń basqa da qatysýshylarynyń ómiri men densaýlyǵyna qaýip tóndiretinin taǵy bir márte eskertti. Barlyq júrgizýshini erejeni qatań saqtaýǵa jáne joldarda qaýipsizdikti qamtamasyz etýge shaqyrdy. Sondaı-aq azamattar da joldarda qaýipsizdikti qamtamasyz etý úshin osyndaı jaǵdaılar týraly polısııaǵa habarlaý kerektigin eske saldy.
Shyǵys Qazaqstan oblysy