«Táýelsiz Qazaqstan tarıhynda el múddesi úshin aıanbaı eńbek etken azamattar az emes. Zamanbek Qalabaıuly – osyndaı tuǵyrly tulǵalardyń biri. Ol egemendiktiń alǵashqy kezeńinde kóptegen jaýapty qyzmetti abyroımen atqardy. Memleketimizdi nyǵaıtýǵa aıryqsha atsalysyp, óńirlerdi órkendetýge zor úles qosqany daýsyz», degen Prezıdent Qasym-Jomart Toqaev memleket jáne qoǵam qaıratkeri Zamanbek Nurqadilovtiń týǵanyna 80 jyl tolýyna oraı týǵan jerinde tuǵyrly eskertkish ornatýdy, Almatydaǵy turǵan úıinde eskertkish-taqta ashýdy tapsyrǵan edi.
Apta basynda aýdan ortalyǵy Kegen aýylynda ult qaıratkeriniń esimi ulyqtalyp, taý tulǵanyń eńseli eskertkish-bıýsti tuǵyrǵa qondy. Bıylǵy oqý jylynyń basynda osy aýmaqta ornalasqan Kegen aýylyndaǵy balalar óner mektebine Zamanbek Nurqadilovtiń esimi berilgen edi. О́ńirdiń ónerli ulandarynyń qanatyn qataıtyp, býynyn bekitetin sáýletti ǵımarat kúrdeli jóndeýden ótip, esigin aıqara ashsa, endi, mine, jas urpaqtyń rýhyn asqaqtatyp, el múddesine qyzmet eter patrıot bolyp qalyptasýyna yqpal etetin alyp tulǵanyń tas músini boı kóterdi. Bul jańalyqqa jıylǵan jurttyń qarasy qalyń boldy. Saltanatty is-sharaǵa qoǵam qaıratkerleri, zııaly qaýym ókilderi men otbasy músheleri qatysyp, táýelsiz elimizdiń damýyna ólsheýsiz úles qosqan memleket qaıratkeri Zamanbek Nurqadilovtiń eren eńbegi men dara bolmysy týraly tolǵaqty áńgimelerdiń tıegin aǵytty.
Almaty oblysy ákiminiń orynbasary Nurjan Qudaıbergenov qaıratkerdiń el damýyna qosqan zor úlesin atap ótip, onyń eńbeginiń ult tarıhynda máńgi saqtalatynyn jetkizdi.
«Bul eskertkish – halqymyzdyń qaıratkerge degen shynaıy qurmetiniń belgisi. Ult janashyry retinde Zamanbek Nurqadilov el egemendiginiń nyǵaıýyna eleýli úles qosty. Osyndaı tulǵalardyń eńbegin urpaqqa mura etý – ortaq paryzymyz. Sondaı-aq bıiktigi 4,5 metr bolatyn bul týyndynyń avtorlary Aıdos Búrkitbaev pen Tımýr Nurmuhametovke alǵysymyzdy bildiremiz», dedi oblys ákiminiń orynbasary.
О́z kezeginde qoǵam qaıratkerleri Toqqoja Estenov pen Bolat Nurǵazıev qıyn-qystaý shaqta eldiń eńse tikteýine kúsh salǵan sańlaq saıasatker Zamanbek Nurqadilovtiń Almaty qalasynyń ákimi qyzmetin atqarǵan shaǵynda qala jaǵalaǵan qazaq balasynyń alyp shaharda shańyraq kóterip, baspanaly bolýyna jasaǵan qamqorlyǵy men iskerligin, ultqa jasaǵan jaqsylyǵyn jipke tizgendeı atap ótti.
Al uly Qaırat Nurqadilov bolsa, ákesiniń esimin jańǵyrtyp, 80 jas mereıtoıynda eńseli eskertkish-bıýstiń ornatylýyn tikeleı tapsyrǵan Memleket basshysyna, qoldaý bildirgen týys-týǵandary men buqaraǵa rızashylyǵyn bildirdi.
«Qatal ýaqyt pendesin kózden jasyrǵanmen, onyń qoǵam ıgiligine sińirgen eńbegin jasyryp qala almaıdy. Onyń dáleli búgingi bıýstiń ashylýy – Zamanbek Qalabaıulynyń tarıhtaǵy taýsylmas ǵumyry, jyǵylmas tuǵyry», dedi Qazaqstannyń eńbek sińirgen qaıratkeri, teatr jáne kıno akteri Bekjan Turys.
Zańǵar tulǵa eskertkishiniń ashylý saltanatynda jazýshy, qoǵam qaıratkeri Zeınep Ahmetova bastap, aýyl ájeleri qostap shashý shashty. О́r minezdi ult perzentiniń taýdaı tulǵasyna bas ıip, taǵzym etken qonaqtar men aýdan jurtshylyǵy alqyzyl gúl shoqtaryn qoıdy.
Saltanatty is-sharaǵa qatysqan qaýymǵa Zamanbek Nurqadilovtiń ómiri men qyzmeti týraly «Ne tolko o sebe» atty kitaptyń 300 danasy taratyldy. Sondaı-aq qoǵam qaıratkeriniń rýhyna baǵyshtalyp Quran oqylyp, as berildi.
Almaty oblysy,
Kegen aýdany