Osy jyldyń 11 aıynda Almaty oblysynda 23 myńǵa jýyq bala ómirge kelgen. Olardyń 204-i egizder bolsa, 1 úshem bar. Sonyń ishinde oblys ortalyǵy Qonaev qalasynda 1000-nan astam náreste dúnıe esigin ashqan.
Emdeý mekemesiniń perzenthana bólimshesinde búgingi ýaqyt talabyna saı kóptegen jańashyldyq oryn aldy. Bastysy, bosaný bólmeleri jeke josparlanyp, olar sapaly túrde barlyq qajetti qural-jabdyqtarmen qamtamasyz etildi. Bosaný bólmelerine yńǵaıly transformer tósekter qoıylyp, kardıomonıtor, balanyń kıimin aýystyrǵanda jylytylatyn ústelder, operasııalyq shamdar, elektrondy tarazylar, basqa da kerek-jaraqpen jabdyqtalýy erekshe nazar aýdartady. Sonymen qatar tek bir rettik jıyntyqtar, kateterler, ınfýzııalyq júıeler qoldanylady. Perzenthana men gınekologııalyq bólimshelerdiń medısınalyq qural-jabdyqtarmen qamtylýy búginde 100 paıyzdy qurap otyr.
Qonaev qalalyq kópsalaly aýrýhanasynyń perzenthanasynda áıelder bosanatyn bólmelerdiń óte yńǵaıly ári qolaıly etip jasalǵanyna jýyrda bosanǵan jas ana rızashylyǵyn bildirdi. Onyń sózinshe, áıel tolǵatqanda ózin yńǵaıly sezinip, palatada erkin qozǵalysta bolady. Tipti súıikti áýenin tyńdaı alatyny áıelderdiń tolǵaǵyn jeńildetip, qorqynyshyn seıiltýge septesedi. Sonymen qatar jeke kıimderi men gıgıenalyq quraldaryn paıdalanýǵa múmkindik bar.
«Bizdiń perzenthananyń dárigerleri tabıǵı bosanýdy qoldaıdy. Sondyqtan dáriger tek bosaný kezeńin baqylaıdy, aralasady, tek qatań medısınalyq sebeptermen dári-dármekterdi qoldanady. Bosaný kezindegi kez kelgen manıpýlıasııalar medısınalyq aralasý qajettiligin egjeı-tegjeıli túsindirip, bosanǵan áıeldiń kelisimin alǵannan keıin ǵana júzege asyrylady. Bólimshede deni saý júkti áıelderge ǵana emes, sonymen qatar táýekel tobyna jatatyn naýqastarǵa, perınataldyq problemalary bar áıelderge de joǵary bilikti medısınalyq kómek kórsetiledi. Sondaı-aq kesar tiliginen keıin jatyrynda tyrtyǵy bar áıelderdi de tabıǵı jolmen bosandyrý tájirıbesi júzege asyryp jatyr. Keshendi baǵalaýdan keıin anamnez derekteri, aldyńǵy operasııa kórsetkishterin egjeı-tegjeıli qarastyramyz. Tabıǵı jolmen áıeldiń ózi bosanýy múmkindigin anyqtaımyz. Barlyq medısınalyq is-sharalardy tek tájirıbeli akýsher-gınekologter júrgizedi, aýrýhana dırektory, joǵary sanatty akýsher-gınekolog Aıman Ǵalymjanqyzy jeke baqylaýynda ustaıdy», deıdi áıelder keńesiniń akýsher-gınekolog dárigeri Nazgúl Eleýsizova.
Almaty oblysy