Aspantaý aıasyndaǵy aýdandyq mádenıet úıinde «Kegen» halyq teatrynyń ártisteri dramatýrg Beksultan Jákeevtiń «Taǵdyr» atty dramasyn sahnalady. Qoǵamdaǵy adamı qundylyqtardyń quldyrap ketkendigin beıneleıtin spektakldiń rejısserleri Qazaqstannyń eńbek sińirgen qaıratkerleri Omar Qıqym men Bekjan Turys ekendigin estigen el qoıylymdy tamashalaýǵa taıly-tuıaǵymen jıylyp, ıne shanshar oryn bolmaýy – aýyl teatryna sony serpin berdi.
Qartaıǵan shaǵynda tórt qabyrǵaǵa telmirip, qııalyndaǵy báıbishesimen syrlasýy arqyly jas óskinniń júregine meıirim men adamgershiliktiń dánin egip, ulttyq tálim-tárbıe sińirýdi maqsat etken spektakldiń kórkemdik mazmunyn ashýǵa teatr akterleri az ter tókpegen. Qoıylym keıipkerlerin Almaty oblysynyń qurmetti azamaty, Qazaqstannyń eńbek sińirgen mádenıet qaıratkeri Naǵıma Talasbaeva, aýdandyq mádenıet úıiniń rejısseri Nurbaqyt Arshyn jáne «Kegen» halyq teatrynyń ártisteri Aqmaral Súleımen, Bahargúl Aıtbaeva, Anara Mustafaeva, Aıym Tileýkeeva, Nurym Baıbala, Kádirbek Súleımen syndy talantty ártister somdap, sheberlikterine tánti etti.
«Jarty ǵasyrdan asqan «Kegen» halyq teatry zaman kóshinen qalmaı, jańa býynnyń qalyptasýyna, olardyń qabilet-qarymyna qaraı qoıylymdar qoıýdan jańylǵan emes. Sonyń nátıjesinde jetistikterimiz de kóp. Talaı syn-belesterden óttik. Taǵdyry talqyǵa túsken qarttardyń ómirin arqaý etken «Taǵdyr» qoıylymyn sahnalaýda ónerdiń qos tarlany Omar Qıqym men Bekjan Turystyń atsalysýy, shyn máninde, teatrymyzdyń mereıin ósirip, mártebesin bıiktetti. Búgingi ómirdi beıneleıtin spektakl anshlagpen ótti», deıdi Qazaqstannyń eńbek sińirgen mádenıet qaıratkeri, teatr rejısseri Naǵıma Talasbaeva.
Aýdandyq mádenıet úıinde eki kún sahnalanǵan spektakldiń premerasy kórermenniń qoshemetine bólendi. Qarttardyń ómirin arqaý etken qoıylymdy sahnalaǵan teatr ónerpazdaryna aýdan ákimi N.Teńizbaev jurtshylyq atynan alǵys bildirdi.
«Qazaqtyń júregi – qalada emes, dalada» deıtin edińiz. О́zderińiz de aýyl teatrynan qanat qaqtyńyzdar, sondyqtan «Kegen» halyq teatryna qoldaý bildirip, qoıylymǵa qolushyn berseńizder» degen aýdandyq mádenıet úıiniń dırektory Ernat Ysqaqtyń biraýyz sózin jerge tastamaı, osy iske táýekel ettik. Túrli taǵdyrdy arqaý etken spektakldi sahnaladyq. Bizben birge jumys istegen halyq teatrynyń akterleri de shabyttanyp, ashyla óner kórsetti. Teatr – tálim men taǵylymnyń qaınar kózi. Qazirgi ýaqytta rýhanı azǵyndyq beleń alyp, qazaqy qundylyqtarymyz qunsyzdanyp jatyr. Arzan kúlki, oısyz uıqynyń salmaǵy basyp turǵany aqıqat. Jalpy, qazaq bolmysynyń qazyǵy – tektilik desek, búgingi býyn sodan alystap, qatygezdik pen ımansyzdyqqa boı aldyrǵan oǵash oqıǵalar men qaýipti qubylystar jıilep ketti. Sondyqtan aýyl mádenıetin órkendetip, teatrdyń mártebesin kóterýge, kórermenge oı salarlyq kórkem dúnıeler usynýdy ózimizdiń jaýapkershiligimizge aldyq», deıdi qoıylymnyń bas keıipkerin somdaǵan óner qaıratkeri Bekjan Turys.
Kórermenniń kózaıymyna aınalǵan «Kegen» halyq teatry 1968 jyly qurylǵan. Qazirgi tańda 15 adam turaqty jumys isteıdi. Teatr ujymy alǵashqy jyly M.Áýezovtiń «Qaragóz», «Eńlik-Kebek» dramalaryn sahnalap «halyq» teatry degen qurmetti ataqty ıelengen. Tynbaı eńbektenýdiń arqasynda búkilodaqtyq I, II, III festıvaldar laýreaty atanǵan. Altyn medaldar alyp, avtobýs ıelengenderi de tarıh betinde.
«1988 jyly Polshanyń Zelonogor qalasynda ótken halyqaralyq folklorlyq-etnografııalyq ansambline teatr janynan qurylǵan «Toǵyzbulaq tolqyndary» folklorlyq-etnografııalyq ansambli qatysyp, I dárejeli dıplommen jáne «Úlken altyn» medalimen marapattaldy. 2002 jyly Ilııas Jansúgirov atyndaǵy mádenıet saraıynda ótken aýdan kúnderinde teatrdyń «Aıman-Sholpan» spektakli joǵary baǵalanyp, «PAZ» avtobýsyn ıelendik. Munyń barlyǵyna teatr ujymy tabandylyǵynyń arqasynda qol jetkizdik. Araǵa eki jyl salyp akademııalyq M.Áýezov atyndaǵy drama teatrda Mádenıet mınıstrligi uıymdastyrǵan respýblıkalyq halyq teatrlary baıqaýynda M.Shamqalovtyń «Qaıyn ene men kelin» atty komedııasyn qoıdyq. Sanamalar bolsaq, jarty ǵasyrdan asqan ýaqyt aralyǵynda «Kegen» halyq teatry osy ýaqytqa deıin úlkendi-kishili 50-ge jýyq pesa sahnalaǵan eken», dep teatr tarıhyn tarqatqan Naǵıma Talasbaeva sońǵy shırek ǵasyrda da jemisti eńbek etkenderin tilge tıek etti.
Eki jyl buryn Almaty oblystyq halyq teatrlar baıqaýynda bas júlde ıelengen «Kegen» halyq teatrynyń ártisteri aýdanda ótken barlyq mádenı is-sharaǵa qatysyp, el yqylasyna bólenip júrgenin aıryqsha ataý abzal.
Almaty oblysy