Bıyl kórnekti aqyn, satıra sardary Shona Smahanulynyń týǵanyna 100 jyl toldy. Soǵan oraı ashylýyna osydan 40 jyl buryn qalamgerdiń ózi uıtqy bolǵan Almaty qalasyndaǵy №62 gımnazııada Shona Smahanuly atyndaǵy murajaı ashyldy.
Mektep ujymy mazmundy is-sharaǵa tııanaqty daıyndalǵan. Oqýshylar qalamger shyǵarmalarynan kórinis qoıyp, satıralyq týyndylaryn jatqa oqydy.
Shona Smahanuly – artyna mol ádebı mura qaldyrǵan sýretker. Mektep murajaıyna satırıktiń qoljazbalary, jazý máshińkesi men ózi tutynǵan jeke zattary qoıylǵan.
Satıra sańlaǵynyń esimi qaıratkerligimen belgili. Qalamger ulttyq múddeni bárinen joǵary qoıyp, Almatyda qazaq mektepteri men balabaqshalaryn ashýǵa bilek sybanyp kiristi. Jazýshylar odaǵy janynan qazaq mektepterin ashýmen aınalysatyn mektep keńesin ashyp, uıymnyń tóraǵasy retinde oqý-aǵartý isiniń ózekti máselelerin respýblıka basshylyǵyna jetkizdi. Zııaly qaýymdy ún qosýǵa shaqyrdy. Osy zııaly top ókilderi qala aralap, ata-analarmen jıyn ótkizip, qazaq tilindegi bilim oshaqtarynyń qataryn kóbeıtýge kúsh saldy. Máselen, 80-jyldary Almatyda bir ǵana qazaq mektebi bolǵan. Sóıtip, ana tilimizde bilim beretin mektepterdiń sany birte-birte kóbeıip, 20-dan asty.
– Biz oqýshylarǵa týǵan halqynyń keleshegine alańdaǵan kúresker tulǵanyń ádebı murasymen birge, qaıratkerligin únemi úlgi etemiz. Murajaıǵa qoıylǵan buıymdar qalamgerdiń jeke ómiri men shyǵarmashylyǵynan aıshyqty kórinis beredi.. 1983–1984 oqý jylynda alǵashqy qazaq mektepteriniń biri bolyp ashylǵan №62 gımnazııadan qanshama túlek qanattandy. Al Sh.Smahanulynyń esimi mektebimizge 1991 jyly berildi. Elge, tilge janashyr zııaly qaýymnyń arqasynda Almatyda №12, №86 qazaq mektebinen keıin ashylǵan №62 qazaq orta mektebine búginde gımnazııa mártebesi berilgen. Bizdiń bilim oshaǵymyzdyń tarıhy shejirege toly. Munda elimizge tanymal kóptegen qaıratker oqyǵan. Mektep alǵash ashylǵanda 18 muǵalim bolyp qyzmet istegen. Ásirese birinshi dırektory, Bilim berý isiniń úzdigi Baqtyǵalı О́serbaevtyń eńbegi erekshe. Onyń bilim berýdegi mol tájirıbesi mekteptegi bilim sapasyna aıtarlyqtaı septigin tıgizdi. Sondaı-aq osy jyldar aralyǵynda Ý.Baısaqalova, V.Nurmaǵanbetova, M.Tólendıev, Á.Áljapparov Q.Nazarbetov, A.Bıjanov syndy azamattar basshylyq etip, bilim uıasynyń damýyna zor úles qosty. 1999 jyly mektepke arab, aǵylshyn, fransýz tilderin tereńdetip oqytatyn arnaıy mártebe berildi. Al 2001 jyly lıngvıstıkalyq gımnazııa, 2008 jyldan gımnazııa mártebesinde sapaly bilim berýdiń ortalyǵyna aınalyp otyr», dedi mektep dırektory Mıramgúl Nabıdollaeva.
Sapaly bilim men ónegeli tárbıe berýde bilikti ustazdardyń orny aıryqsha. Osy oraıda Almaty qalasy bilim basqarmasynyń uıymdastyrýymen ótkizilgen «Pedagogter» baıqaýy men konkýrstarynda mekteptiń 20-dan astam muǵalimi jeńimpaz atanyp, respýblıkalyq telesabaqtar men beınesabaqtarda kósh bastap keledi. Al túlekterdiń 80 paıyzǵa jýyǵy keıingi on jylda memlekettik grant ıesi atanǵan. Osy jyldarda 45-ke jýyq oqýshy «Altyn belgi» ıegeri bolsa, halyqaralyq, respýblıkalyq, qalalyq ǵylymı jobalar, zııatkerlik, sondaı-aq Mahambet, Abaı, Maǵjan, Muqaǵalı, Qadyr oqýlarynyń jeńimpazdary, jalpy bilim beretin pánder boıynsha olımpıadalardyń júldegerleri gımnazııa maqtanyshy bolyp júr. Keıingi 5 jylda gımnazııanyń «Nargız» bı ansambli «Aq Shaǵala» jáne «Boztorǵaı» festıvaline qatysyp, júldeli oryndy enshilegen.
ALMATY