Táýelsizdik kúnine oraı Qarasaı aýdanynyń «Gúlnar Baq» demalys bazasyndaǵy ıppodromda ulttyq at sporty túrlerinen jastar arasyndaǵy oblys birinshiligi aıaqtaldy.
Dúbirli jarys ulttyq at sportynyń kókpar, aýdaryspaq, jamby atý, teńge ilý syndy tórt túri boıynsha uıymdastyryldy. Baıraqty básekege oblystyń barlyq aýdan men Qonaev qalasynan 160-tan asa jas sportshy qatysty. Kókparda 7 komanda baq synady.
Aýdaryspaqta sportshylar 52-90 kg aralyǵyndaǵy 8 salmaq dárejesinde synǵa tústi. Jamby atý qazaq, koreı stılderi boıynsha ótti. Teńge ilýde qatysýshylar «bes beles», «qos qulash», «jeti qut» atty úsh stılde básekege tústi.
Chempıonattyń negizgi maqsaty – ulttyq at sporty túrlerin nasıhattap, jastardyń sheberligin arttyrý, ulttyq at sporty túrlerinen oblys quramasyna irikteý ótkizý. Saltanatty ashylý rásiminde mártebeli meımandar men Almaty oblysynyń dene shynyqtyrý jáne sport basqarmasynyń ókilderi sóz sóılep, jarystyń aımaqtaǵy at sportynyń damýy men jetilýine jańa serpin beretinine toqtaldy.
«Men bala kezimnen at sportymen aınalysamyn. Búgingi jarysta Raıymbek aýdanynyń namysyn qorǵaımyn. Bıyl Shymkentte ótken respýblıka chempıonatynda Almaty oblysy quramasynyń sapynda óner kórsetip, 3-orynǵa ıe boldyq. Komandamyz óte uıymshyl, fýtboldaǵydaı áreket etemiz – bir oıynshy serkeni kóteredi, ekinshisi ony qarsylastardan qorǵaıdy, al úshinshisi qarsy shabýyldap, jol ashady. Bul – bizdiń taktıkamyz», – deıdi Raıymbek aýdanynyń kókparshysy Bereke Qasymaqyn.
Úsh kúndik saıystyń qorytyndysynda Qarasaı aýdanynyń ókilderi kókpar týrnıriniń jeńimpazy atandy. 2-oryndy Raıymbek aýdanynyń, 3-oryndy Kegen aýdanynyń komandasy enshiledi.
Aýdaryspaq saıysynda Raıymbek aýdanynyń sportshylary Qaırat Ábdýsabyr, Sultanbek Sársenbaı, Almas Tókenuly, Ádilet Obyljan, Talǵar aýdanynyń ókilderi Nurshat Aranǵazıev, Sanjar Sábıt, Kegen aýdanynan Álı Ermuhamet, Uıǵyr aýdanynan Álıhan Maqsatuly úzdik nátıje kórsetti.
Jamby atýdan (at ústinen sadaq atý) Almaty oblysynda jasóspirimder men qyzdar birdeı óner kórsetedi. Olar bıylǵy respýblıkalyq jarystarda kósh bastady. Chempıonattyń úzdigi bolyp Madııar Sháripbaı (Kegen) tanyldy.
Teńge ilý saıysynyń damýyna Eńbekshiqazaq, Qarasaı, Kegen aýdandarynyń qosqan úlesi zor. Bıylǵy jeńimpaz ataǵyn Eńbekshiqazaq aýdanynan Ersin Nurálı ıelendi.
Jalpykomandalyq esepte 1-oryn Raıymbek aýdany, 2-oryn Kegen aýdany, 3-oryn Uıǵyr aýdanyna buıyrdy. Jeńimpazdar men júldegerlerge kýbokter, medaldar, dıplomdar, aqshalaı syılyqtar tabystaldy. Júlde qory 2 600 000 teńgeni qurady.
Almaty oblysy