Estonııa jáne Fınlıandııa elderinde Qazaqstan Táýelsizdigi kúni merekesine oraı Astana qalasynyń mádenı kúnderi ótti. Tallın jáne Helsınkı qalalarynda uıymdastyrylǵan mádenı-sazdy keshterge E.Rahmadıev atyndaǵy memlekettik akademııalyq fılarmonııa ujymdary men solısteri, Fransııadan arnaıy kelgen skrıpkashy, Qazaqstannyń eńbek sińirgen qaıratkeri Marat Bısenǵalıev qatysty.
Qazaqstandyq ártister Estonııa Mýzyka jáne teatr akademııasynyń konsert zalynda óner kórsetti. «Uly dala daýysy» dep atalǵan kesh baǵdarlamasyn Marat Bısenǵalıev ashyp, brıtan kompozıtory, romantıkalyq baǵyttaǵy mýzyka ókili Edvard Elgar men qazaqtyń klassık kompozıtory Muqan Tólebaevtyń shyǵarmalaryn oryndady. «Qorqyt» etno-ansambli Dáýletkereıdiń «Kóruǵly» kúıi men ansambldiń kórkemdik jetekshisi Sholpan Qorǵanbektiń «Amanat», «Kók túrikter» atty avtorlyq shyǵarmalaryn usyndy.
Keshtiń kórkin astanalyq fılarmonııa solısteri keltirdi. Atap aıtqanda, halyqaralyq baıqaýlardyń laýreaty Ánel Smaılova «Kózińniń móldirin-aı», Nuraıym Ertalapqyzy «Beý, Aıdaı» ánderin áýeletti. Al halyqaralyq baıqaýlardyń laýreattary Fırýza Rahmetova, Nursát Almas, Shahrızada Tynyshtyq jáne Altynbek Arystanbektiń oryndaýyndaǵy operalyq shyǵarmalar kórermenniń erekshe yqylasyna bólendi.
Helsınkıdiń «Musiikkitalo» konsert zalynda ótken konsertte opera ánshisi, Qazaqstannyń eńbek sińirgen qaıratkeri, Memlekettik syılyqtyń laýreaty Súndet Baıǵojın Abaıdyń «Aıttym sálem, kalamqas» ánimen jınalǵan qaýymdy erekshe kúıge bóledi. Ánshini roıalmen belgili kompozıtor Rınat Ǵaısın súıemeldedi.
Aıta keteıik, bul keshter Astana qalasy máslıhaty depýtattarynyń Estonııa jáne Fınlıandııaǵa resmı saparyna sáıkes keldi.
«Mýzyka tili – ultyna qaramastan bárine túsinikti til. Al mádenı kópir elder arasyndaǵy eń berik baılanys ornatýdyń joly. Fınlıandııa astanasy Helsınkıde ótken Astana qalasynyń mádenı kúnderi ónerdiń halyqtardy jaqyndastyra alatynynyń jarqyn úlgisine aınaldy. «The Voice of the Great Steppe» konserttik baǵdarlamasy dostyqty beınelep, Qazaqstan men Fınlıandııa arasyndaǵy mádenı baılanysty nyǵaıtýdaǵy mańyzdy qadamdardyń biri boldy», dedi Astana qalasy máslıhatynyń tóraǵasy Erlan Kanalımov.
Kesh barysynda qazaqtyń án-kúılerimen qatar ózge tildegi týyndylar da oryndaldy. Sonyń ishinde «Qorqyt» etno-ansambli áıgili fın áýeni «Levan Polkka» shyǵarmasymen kórermendi tańǵaldyrdy.