2024 jyldyń birinshi jartyjyldyǵyndaǵy jol qozǵalysy boıynsha elderdiń reıtınginde Qazaqstan 87 eldiń ishinde 46-shy orynǵa turaqtady, dep habarlaıdy Egemen.kz Energyprom sarapshylaryna silteme jasap.
Bıyl elimizdiń ındeksi 135,8 boldy. Bir jyl buryn Qazaqstan 136,7 ındeksimen álemdegi 85 eldiń ishinde 44-orynda bolǵan.
Mamandardyń aıtýynsha, 2024 jyldyń birinshi jartyjyldyǵynda árbir el azamaty bir jaqty saparǵa 35,6 mınýt jumsasa, SO2 shyǵaryndylary shamamen 2 kg quraǵan. Eldiń kólik júıesiniń tıimsizdigi ındeksi 144,2 ball deńgeıinde baǵalanǵan.
Jol qozǵalysy ındeksinde Nıgerııa, Kosta-Rıka jáne Bangladesh eń nashar elder bolsa, Estonııa, Avstrııa jáne Fınlıandııa úzdik dep tanylǵan. TMD elderiniń ishinde Reseı, Ázerbaıjan jáne Ýkraına Qazaqstan Respýblıkasynan joǵary, al Belarýs pen Armenııa tómende ornalasqan.
Aıta keteıik, esep boıynsha ońtústik astananyń kólik qozǵalysy ındeksi 156,7 quraǵan. 2024 jyldyń birinshi jartyjyldyǵynda Almatyda ortasha eseppen adamdar bir baǵytqa 39,7 mınýt jol júrip, osy ýaqyt ishinde 2,1 kg SO2 shyǵarylǵan. Tıimsizdik ındeksi 176,6 balldy qurady. Salystyrmaly túrde 200 qalanyń ishinde Almaty 85-shi orynda bolǵan.