Úkimet energetıka, kommýnaldyq sharýashylyq salasyn jańǵyrtý maqsatynda ulttyq joba ázirlep jatyr. Qujat jaqynda qabyldanady. Shymkent qalasyn sýmen jabdyqtaýshy mekeme «Sý resýrstary-Marketıng» JShS Ulttyq jobada úlgili kásiporyn retinde qarastyrylyp otyr.
Jýyrda mekemeniń jumysymen tanysýǵa «TÚKSh damytý jónindegi qazaqstandyq ortalyq» AQ, О́nerkásip jáne qurylys mınıstrligi, «Báıterek» Ulttyq basqarýshy holdıngi men Qazaqstannyń Damý bankiniń ókilderi shaharǵa arnaıy keldi. Ulttyq joba boıynsha 2025-2029 jyldary aýyzsý, káriz sý júıeleri, energetıkalyq jeliler elimizde túgel jańǵyrtylady. Bul óz kezeginde kommýnaldyq mekemelerdiń qyzmet sapasyn jaqsartyp, shyǵyndaryn azaıtady. Nátıjesinde, halyqtyń qalypty ómir súrýine jaǵdaı jasalady. Osy rette kommýnaldyq uıymdardyń qyzmeti ǵana emes, olardyń tıimdi basqarýshylyq isi de mańyzdy ról oınaıdy. Delegasııa bul máselege de basa nazar aýdardy. О́ıtkeni kommýnaldyq sala ınvestısııalyq turǵyda tartymdy bolý da kerek. Naryqtyq qoǵamda kásiporyn óz qyzmetimen tabys taýyp, memlekettik bıýdjetke arqa súıemeýi tıis. Ulttyq jobada osy másele aıryqsha kórinis tapqan.
«TÚKSh damytý jónindegi qazaqstandyq ortalyq» basshysy Nurlan Soltambekovtiń aıtýynsha, otyz jyl ishinde kommýnaldyq salada jańǵyrtý júrmedi. Sonyń saldarynan barlyq júıe tozdy. Sondyqtan Úkimet kommýnaldyq sharýashylyq salasyn túbegeıli jańǵyrtýǵa sheshim qabyldady. Alaıda oǵan bólinetin qarajat bıýdjet esebinen emes, nesıelik zaem túrinde bolady. Qysqasy, jańǵyrtý ekinshi deńgeıli bankter men halyqaralyq qarjy uıymdarynyń qarajaty arqyly iske asady. «Báıterek» holdıngi – jobany úılestirýshi negizgi operator.
N.Soltambekovtiń málimdeýinshe, basqarý turǵysynan «Sý resýrstary-Marketıng» JShS óte tıimdi jumys atqaryp keledi. Eger kompanııa tabysty bolmasa, Eýropalyq damý jáne qaıta qurý banki nesıe bermes edi. Atalǵan qarjy uıymy mekemege jeti transh boıynsha nesıelik qarajat bólgen. Mamannyń pikirinshe, kommýnaldyq salany jańǵyrtý tarıf baǵasynyń ósýine alyp keledi. Qymbat tarıf quny – kommýnaldyq ınfraqurylymdy jańǵyrtýdyń birden-bir qarjy kózi. Sondyqtan halyq kommýnaldyq qyzmet aqysynyń qymbattaýyna daıyn bolý kerek. Ulttyq joba aıasynda elimizde 45 káriz sýlaryn tazalaý qondyrǵylary kesheni jańartylady. Myńdaǵan shaqyrym qubyr júıeleri aýystyrylady. Eń bastysy, turǵyndar únemshildikke úırenedi. Kommýnaldyq sala jańarǵan soń qorshaǵan ortaǵa, ekologııaǵa tıgizer zııandy áseri azaıady. Ulttyq jobada kózdelgen basty jospardyń biri osy.
«Sý resýrstary-Marketıng» JShS káriz sýlaryn tazalap, ony eginshilikke paıdalanýǵa sharýalarǵa tegin bosatyp otyr. Sondaı-aq shaıyndy sýdan elektr energııasyn óndiredi. Anglııadan ákelgen arnaıy bakterııa arqyly káriz júıesindegi qaldyqtardy túgeldeı derlik tazalaýǵa múmkindik aldy. Buryn tazalaý qondyrǵysy kesheni mańynda kúlimsi ıis qatty seziletin. Ol tipti mańaıdaǵy eldi meken turǵyndaryna qolaısyzdyq týdyratyn. Jańa tásildi qoldanǵaly kúlimsi ıis ketip, shaıyndy sýdan azǵantaı ǵana qaldyq qalatyn boldy. Ol keshen janynda kóńge aınalǵansha saqtalyp jatady. Tabıǵı tyńaıtqyshty qala ákimdigi gúlzarlar topyraǵyn baıytýǵa paıdalanyp júr. Bakterııanyń arqasynda káriz sý júıesinde eshteńe qalmaıtyn bolǵan soń jaman qaldyqtardy tazalaıtyn, saqtaıtyn burynǵy qondyrǵylar isten shyǵarylyp, rezervke qoıyldy. Osynyń ózi kásiporyn jumysynyń tıimdiligi men únemshildikke qurylǵan strategııasyn kórsetedi.
N.Soltambekovtiń aıtýynsha, árbir sýmen jabdyqtaýshy mekeme osy tásilmen jumys isteýi kerek. Iаǵnı modernızasııa arqyly jumsalatyn shyǵyndardy azaıtyp, taýardyń ózindik qunyn túsirýge kúsh salý qajet. Myqty basqarýshylyq ádis bolmasa istiń bári beker. Aıtalyq jańǵyrtý nátıjesinde qondyrǵylar jańalanar. Biraq jyldar óte báribir tehnıka da, tehnologııa da tozady. Sondaı kezde júıeli menedjment bolmasa kommýnaldyq sala qaıtadan baz-baıaǵy qalpyna túsip qalýy ǵajap emes. Osy oraıda «Sý resýrstary-Marketıng» seriktestiginen úırener úrdis kóp.
ShYMKENT