QOSTANAI. 1 mamyr. «AgromashHoldıng» zaýytynyń óndiris alańynda 20 000-shy mashına qurastyryldy. Mereıli avtomobıl SsangYong Nomad boldy. Bul týraly egemen.kz tilshisi habarlady.
Bes jyl ishinde AllurGroup avtomobıl kompanııasynyń tobyna kiretin eki óndiris alańynan 20 000 mashına shyǵarylsa, onyń 14 542-i «AgromashHoldıng» zaýytynda qurastyryldy, qalǵany «SaryarkaAvtoProm» zaýytynyń konveıerine tıesili. Qostanaıda alǵash 2010 jyly ońtústik koreıalyq brend SsangYong markasynyń 77 mashınasy shyǵaryldy. Kelesi jyly zaýyttaǵy kórsetkish birden 10 ese kóbeıdi. 2012 jyly ekinshi óndiris alańynda ZAZ, ÝAZ jáne Iveco sekildi álemdik brendtter qolǵa alyndy. Al 2013 jyly «Saryarka Avto Prom» zaýytynyń óndiris alańynda Qazaqstanda birinshi ret usaqtúıindi óndiris jelisi iske qosyldy. Qazir bul jelide SsangYong Nomad jáne Toyota Fortuner álemdik brend kólikter qurastyrylady. Bıyl eki zaýyttaǵy brendter qatary Peugeot kóliginiń tórt modelimen tolyqtyryldy. Qazir AllurGroup toby qataryna kiretin óndiris alańdaryndaǵy óndirilgen ónimniń qazaqstandyq mazmuny 30 paıyzdy quraıdy.
«SaryarkaAvtoProm» zaýytynyń óndiris alańynda aýyr kommersııalyq Iveco tehnıkasy tótenshe jaǵdaıda paıdalanatyn, densaýlyq salasyna ıkemdelgen jáne benzovoz sekildi arnaıy mamandandyrylǵan quramda daıyndalady.
Názıra Járimbetova.
Derek, sýret: egemen.kz