Úkimet osy jyly balalardy mektepke deıingi tárbıe jáne oqytýmen qamtýdy 95%-ǵa deıin ulǵaıtýdy josparlap otyr, dep jazady Egemen.kz.
Bıyl mektepke deıingi uıymdarǵa barmaıtyn balalardyń ata-analaryna ádistemelik qoldaý kórsetý, bala kútimine baılanysty keńes berý pýnktiniń sany 4 245-ke deıin kóbeıtiledi.
Oqý-aǵartý mınıstrlginiń málimetinshe, memlekettik 260 balabaqshada qaıta jóndeý jumystary júrgizilip, qural-jabdyqtar jańartylady. 500 myń bala qazaq tilin tereń oqytý boıynsha «Tilge boılaý» pılottyq jobasyna qatysady. 2025 jyly elimizdiń barlyq óńirinde «Aqsha balanyń sońynan júredi» qaǵıdaty boıynsha mektepke deıingi tárbıe jáne oqytý uıymdaryn vaýcherlik qarjylandyrý júıesin engizý josparlanyp otyr.
Orta bilim berýde 272,8 myń oqýshyǵa arnalǵan oryn engizý, erekshe qajettiligi bar balalardyń 90 paıyzyn arnaıy psıhologııalyq-pedagogıkalyq qoldaý jáne erte jastan túzetý sharalarymen qamtý, fızıka, hımııa, bıologııa, robototehnıka, STEM pánderi boıynsha 1 myń zamanaýı kabınet satyp alý, 1,3 myń aýyl mektebin qaıta jańartý jobasyn iske qosý kózdelgen.
Kolledjderde tehnıkalyq jáne kásiptik bilim berý baǵyty boıynsha suranysqa ıe mamandyqtarǵa (9-synyp túlekterin) 100% tegin oqytý, jumysqa ornalastyrý mindettemesimen maqsatty tapsyrysty 10 myń orynǵa ulǵaıtý, jan basyna shaqqandaǵy normatıvtik qarjylandyrý kólemin 2 esege arttyrý, 80 kolledjdiń materıaldyq-tehnıkalyq bazasyn jeke ınvestısııalardy tartý arqyly nyǵaıtý jáne jabdyqtaý, kolledjderde 10 shaǵyn kásiporyn ashý josparlanǵan.