Almaty polısııasynyń qyzmetkerleri balalardy kólikte arnaıy oryndyqtarda tasymaldaý qajet ekenin eske saldy, dep habarlaıdy Egemen.kz Polisia.kz-ke silteme jasap.
Tártip saqshylary jol qozǵalysyna qatysýshylarǵa erejelerdi qatań saqtaýdy, sonyń ishinde jol-kólik oqıǵalary saldarynan bolatyn jaraqattardy azaıtý úshin arnaıy balalardy ustaý quraldaryn paıdalaný qajettigin eskertti.
«Jyl basynan beri Almaty joldarynda balalardyń qatysýymen 1511 jol-kólik oqıǵasy tirkelip, saldarynan tórt bala kóz jumǵan, taǵy 1600-den astam bala jaraqat alǵan. Balalardy avto oryndyqtarǵa otyrǵyzý áýre-sarsań emes, bul jol qozǵalysynyń eń jas qatysýshylarynyń qaýipsizdigine kepildik beretin talaptar ekenin túsiný óte mańyzdy», dedi Almaty qalasy PD jergilikti polısııa qyzmeti basqarmasy bastyǵynyń orynbasary Tımýr Noǵaıbaev.
Profılaktıkalyq is-sharalar barysynda polısııa qyzmetkerleri kólik júrgizýshilerine taqyryptyq jadynamalar taratyp, balalar qaýipsizdigi máselesine eresekterdiń nazaryn aýdardy.
«Balalardyń joldaǵy qaýipsizdigi eń aldymen ózimizge baılanysty. Kóptegen ata-ana balasyn tasymaldaý úshin avto oryndyqtyń qajeti joq dep esepteıdi, sebebi balalar tez ósip ketedi. Biraq balalardy tasymaldaýǵa arnalǵan transformasııalanatyn oryndyqty satyp alýǵa bolady. Balalaryńyzǵa qamqor bolyńyzdar», dedi Tımýr Noǵaıbaev.