Talantty qazaq balasy Dýbaıda ótken «Sanremo Best Song 2025» halyqaralyq baıqaýynda bas júldeni enshilep, el abyroıyn asqaqtatty. Erjan Maksım bul óner dodasynda úzdik atanyp qana qoımaı, tanymal prodıýserlik ortalyqtardan áriptestik jóninde shaqyrtý aldy. Álemdik sahna shejiresinde erekshe oryn alatyn áıgili halyqaralyq baıqaý bıyl ózgeshe formatta ótti.
О́ner saıysy arab memleketteri aýmaǵyn jaǵalaı júzip júretin alyp kemede uıymdastyryldy. Baıqaýdan qalyń kórermen de, oǵan qatysqan jas ónerpazdar da aıryqsha áser aldy. Al bala kezinen tyńdarmanyn ózindik ónerimen tamsandyryp júrgen Erjan Maksımge qazylar alqasy joǵary baǵasyn berdi.
«Qazaqstannan 36 adam kelgen edik. Halyq áni «Aıqarakózdi» aıtqanyma qýanyshtymyn. Eń súıikti ánderimniń biri boldy. Osy konkýrsqa qatysý úshin úlken qoldaý kórsetken kompanııaǵa raqmet aıtamyn», deıdi baıqaýdyń bas júldegeri Erjan Maksım.
Oraldyq óren buǵan deıin Reseıde ótken «Golos. Detı» halyqaralyq án saıysynda jeńis tuǵyrynan kóringen edi. Bala kezinde-aq talaıdy tańǵaldyryp, birneshe báıgede oza shapqan. Dese de, Sanremo baıqaýyndaǵy bas júlde onyń jetistigin eselep qana qoımaı, álemge tanylýyna sep boldy.
Erjan qazir Astanadaǵy Ulttyq óner ýnıversıtetinde bilim alyp júr. Stýdent bolsa da birqatar prodıýserlik ortalyqtan áriptestik jóninde shaqyrtý alǵan. Endi ol usynystardy qarastyryp, shyǵarmashylyǵyn odan ári shyńdaýǵa den qoıady.