Petropavl qalasynyń qoǵamdyq jolaýshylar tasymaldaý marshrýttary qazir qala aýmaǵynyń ulǵaıýyna baılanysty uzara túsken. Máselen, byltyrǵy tasqyn sýdan japa shekkenderge salynǵan bir ǵana «Birlik» shaǵyn aýdanynyń boı kóterýimen osy jaqqa júretin avtobýs marshrýty 14 shaqyrymǵa uzardy. Osyǵan baılanysty jańa avtobýstar satyp alý mindeti de alǵa qoıyldy. Jýyrda qala ishindegi jolaýshy tasymaldaý avtoparki jańadan eki Iýtong avtobýsyn qatarǵa qosty.
Bul – Qytaı kóligi, zaýyttyń shtab-páteri Chjenchjoý qalasynda ornalasqan. Avtobýs naǵyz osy zamanǵy qoǵamdyq kólik talaptaryna saı jasalǵan. Kireberis basqyshy barynsha tómen bolǵandyqtan, qart adamdar men múgedekter oǵan qınalmaı shyǵa alady. Ishi keń, oryndyqtary yńǵaıly, júrgizýshiniń kabınasy qorshalǵan. Iýtongtyń qurylys mashınalary, jyljymaıtyn múlik, basqa da ınvestısııalar salasynda kásiporyndary bar. 2016 jyly satylym kólemi jóninen álemdegi eń iri avtobýs óndirýshi bolyp tanylǵan. «Iýtong Avtobýs» kompanııasy kóptegen elde ózderiniń fılıaldaryn ashqan. Elimizde Qytaıdyń osyndaı avtobýstary 2021 jyldan beri Qaraǵandy aýmaǵynda, «QazTehna» zaýytynda jınalady.
Petropavl kóshelerine shyqqan jańa avtobýstar ári bıik, ári uzyn, tynysy keń. Salony da burynǵy avtobýstarǵa qaraǵanda ózgertilgen. Joǵaryda aıtqanymyzdaı, júrgizýshiniń aınalasy qorshalyp, oǵan jolaýshylardyń tónip turýyna, suraqtar berip, sózge tartýyna múmkindik bermeıtindeı etip jasalǵan. Avtobýstyń jaılylyǵy jolaýshylar tarapynan jaqsy baǵasyn alyp úlgerdi.
Avtobýs qysta jylytatyn, jazda sýytatyn jylytý júıesi, kondınsıonerlermen de tolyq qamtylǵan. Jolaýshy tasymaldaý «Kyzylzhar Buses» JShS-nyń basshysy Baýyrjan Qusaıynov: «Jańa avtobýstardy «Birlik» shaǵyn aýdanyna jolaýshylar tasymaldaıtyn №4A marshrýtyna shyǵardyq. Aldaǵy ýaqytta osyndaı avtobýstar sanyn molaıtýdy josparlap otyrmyz», dedi.
Aıta ketetin jaıt, sońǵy úsh jylda kásiporyn avtobýstaryn 80%-ǵa jańartqan eken. Soǵan oraı jolaýshylar tarapynan aryz-shaǵym da azaıdy. Byltyr kásiporyn «Yutong», «Dongfeng» fırmalarynyń 33 jańa avtobýstaryn satyp aldy. Degenmen kásiporyn basshysy joldardyń sapasyna rıza emestigin de jasyrmady. «Avtobýs qansha jańa bolsa da sapasyz joldardyń uńǵyl-shuńǵyly olardy tez isten shyǵarady. Keıbir joldarǵa tipti asfalt ta tóselmegen. Mysaly, jańa avtobýstar qatynaıtn «Birlik» shaǵyn aýdanynyń biraz jerinde asfalt joq», deıdi B.Qusaıynov.
PETROPAVL