Qýanysh kóbeıgen kún

Mádenıet úıinde ult perzentiniń ómiri men qyzmetin eske alý keshi uıymdastyryldy. Sha­raǵa qala ákimi Ashat Berdi­hanov qa­tysyp, memleketimizdiń damýyna zor úles qosqan ór tulǵanyń eren eńbegin erekshe atap ótti.

«Qalamyzǵa esimi berilgen halqymyzdyń dańqty perzenti, memleket jáne qoǵam qaıratkeri Dinmuhamed Ahmetuly Qonaev atamyz el basqarǵan jyldary keń-baıtaq qazaq jerinde 68 jumysshylar kenti men 43 qala salyndy. Ile ózeniniń boıyna bógen turǵyzylyp, jańa sý elektr stansasynyń boı kóterýine, osy mańda jańa Qapshaǵaı qalasynyń irgetasy qalanýyna da erekshe yqpal etti», dedi qala ákimi.

Qalalyq aqsaqaldar alqasy­nyń tóraǵasy Bazan Oralbaev ta óz kezeginde elý jyl el aǵasy atanǵan memleket qaıratkeri D.Qonaevtyń esimi tarıhta altyn árippen jazylyp, halqymen birge jasaıtynyn aıryqsha atady. Mádenı is-shara ásem ánmen órilip, bımen kómkerildi.

Saltanatty shara sońynda áleýmettik osal toptaǵy otbasy­larǵa, kezekte turǵan azamat­tarǵa 80 páterdiń kilti tabys etilip, qonaevtyqtardyń qýa­nyshy eselendi. Baspanaly bolyp, qýanyshqa kenelgen otbasylar memlekettiń jasaǵan qam­qorlyǵyna júrekjardy al­ǵystaryn jaýdyrdy.

«О́zim kópbalaly anamyn, 7 balam bar. Úı kezeginde 17 jyl­dan beri turǵan edim. Búgin atamyzdyń týǵan kúninde qoly­myz jetti. Qýanyshtymyn. Áleý­mettik osal toptaǵylardy, kópbalaly analardy, jetimder men ardagerlerdi qoldap júrgen­deri­ńizge alǵysymyz sheksiz», dedi jańa úı ıesi Nazym Ahme­tova.

Páterler jekeshelendirý qu­qyǵynsyz jalǵa berildi. Jalǵa alý quny – qoljetimdi. Byltyr Qonaevta 85 otbasyna páter kilti tabystalǵan bolatyn.

Jalpy, Qonaev qalasynda jyl bastalǵaly beri jaǵymdy jańalyqtar jibin úzbeı jal­ǵasyp keledi. Atap aıtsaq, Or­talyq saıabaqqa qazaq ádebıe­­tiniń klassıgi Berdibek Soqpaq­baevtyń esimi berilse, artynsha osy saıabaqtan muz aıdyny ashylyp, qalalyqtardy shat-sha­dyman etti.

Almaty oblysy,

Qonaev qalasy