Sahna syrtyndaǵy shyǵarmashylyq ómirdiń qyr-syry teatrsúıer kórermenge beımálim. Bizdiń kóretinimiz – qanshama eńbek, talant, qajyr-qaırat pen daıyndyqtyń, qaıtalaýdyń, shıryǵý men sharyqtaý nátıjesinen týǵan kórkem dúnıe. Al osy kórgen jannyń kóńilin baýrap, kózin ásemdikke toıdyratyn bekzat ónerdiń sahna shymyldyǵy ashylǵanǵa deıingi qym-qýyt tirshiligi, myń-san máselesi, azan-qazan ómiri kórermen úshin jumbaq álem bolyp qala beredi.
Iá, teatr – shyǵarmashyl jannyń bar ýaqyty men kúsh-jigerin talap etetin óner. Ásirese balet ártisteriniń ómiri kishkentaı qaýip-qaterlerge toly ekeni de ras. Turaqty dene bitimin saqtaý, densaýlyǵyn kútý, tez qalypqa kelý – balet bıshileriniń jazylmaǵan zańdylyǵy syndy. Aıaqtyń ushymen sheber bılep, birin-biri kóterip, bıikten óner kórsetetin balet ártisterinde kútpegen tosyn oqıǵalar, kásibı jaraqattar kóp bolady. Osy oraıda jańa jyl qarsańynda «Astana Opera» teatry janynan elimizdegi alǵashqy mamandandyrylǵan ońaltý ortalyǵynyń ashylýy aıtýly jańalyq bolǵanyn atap ótemiz. Teatr salasyndaǵy bul ıgiliktiń eń birinshi el astanasynyń mádenı jaýhary «Astana Opera» ujymyna buıyrǵany da beker bolmasa kerek. Árıne, bekzat ónerge jańa tynys alyp kelgen ońaltý ortalyǵyn kórýge biz de asyqtyq. Arnaıy at basyn burdyq.
Mádenıet jáne aqparat mınıstrliginiń qoldaýymen «Astana Opera» teatr salasynda jańa standarttardy engizýdi jemisti jalǵastyryp keledi. Sonyń bir dáleli – «Samuryq-Qazyna» qorynyń qarjylandyrýymen iske asqan ıgi bastama ártister men tehnıkalyq ujymnyń belsendi fızıkalyq qozǵalystan jáne jaraqattardan keıin qalpyna kelýi úshin jasalyp otyr.
Jalpy, mundaı ortalyqty ashý máselesi – biraz jyldan beri qozǵalyp kelgen taqyryp. Teatr ujymy túıtkildiń sheshimin tapqanyna shyn qýanyshty. Endi jumys barysynda densaýlyǵyna zaqym keltirý qaýpi joǵary balet bıshileri men dekorasııalardy quratyn sahna mashınısteri mamandandyrylǵan ońaltý kabınetiniń kómegine júgine alady.
«Biz úshin qyzmetkerlerdiń densaýlyǵy – birinshi oryndaǵy másele. Nege deseńiz, olar – teatrdyń jany, osy sahnanyń shamyn jaǵýshylar. О́z talanttarymen ónerimizdi ómirsheń etip keledi. Sondyqtan ártisterimizdiń densaýlyǵyna beıjaı qaraı almaımyz. Osynaý jobanyń mańyzdylyǵyn túsinip, qoldaý kórsetkeni úshin «Samuryq-Qazyna» qoryna rızashylyǵymyzdy bildiremiz. Bul – teatrymyz úshin ǵana emes, elimizdiń tutas teatr salasy úshin jasaǵan eleýli qadam», dep atap ótti teatr basshysy Ǵalym Ahmedıarov.
Sondaı-aq ol balet ártisteri daıyndyq nemese spektakl kezinde jıi jaraqat alatynyn atap ótti.
«Orkestr ártisteri únemi kásibı júıke-bulshyqet aýrýlaryna ushyraıdy, sahna mashınısteri, ásirese sahna operatorlary aýyr dekorasııalardy únemi kóterý jáne ornatý saldarynan jıi jaraqat alady. Dál osy sanattaǵy teatr qyzmetkerleriniń densaýlyǵy únemi ári turaqty ońaltýdy qajet etedi», deıdi teatr dırektory.
Iá, ásirese balet ártisterinde kásibı jaraqattarǵa alyp keletin fızıkalyq júkteme ekeni sózsiz. Osy ýaqytqa deıin olar óz kúshine ǵana senetin, bolmasa oqys jaǵdaıda jalpy beıindik emhanalarǵa júginetin. Endi ońaltý kabınetiniń arqasynda kásibı kómek qoljetimdi bola tústi. Ári jaqyn, ári tegin. Kabınettiń ishi bulshyq etti qalpyna keltirýge, aýyrsynýdy basýǵa ári túrli em-sharalardy júrgizýge arnalǵan zamanaýı quraldarmen jabdyqtalǵan. Dál osy jerde ártisterdiń qalypty jumysyna tezirek oralýyna qalaı kómektesýdi biletin reabılıtolog mamannyń da keńesin alýǵa bolady.
Búginde ońaltý ortalyǵyna kúnine 30 shaqty ártis keledi. Árkimniń em alý barysy ártúrli. Aıta keteıik, ońaltý ortalyǵynda fızıoterapııalyq em-sharalardyń tolyq kesheni bar. Tolyqtaı avtomattandyrylǵan, sensormen basqarylady.
Bas dáriger Edýard Varýshkınniń aıtýynsha, ártisterdi eń aldymen ózi qabyldap, aıtqan shaǵymdaryna baılanysty qajetti birneshe kúndik em taǵaıyndaıdy.
«Kez kelgen kópbeıindi aýrýhana mundaı ońaltý ortalyǵyna qyzyǵar edi. Ońaltý ortalyǵy tolyqtaı avtomattandyrylǵan, sensorlyq basqarýy bar sońǵy býyn tehnologııalarymen jabdyqtalǵan. Munda fızıoterapııalyq prosedýralardyń tolyq kesheni bar. Iаǵnı kelýshiniń máselesine jan-jaqty kómek kórsete alamyz. Dál qazir alty apparatpen emdep jatyrmyz», deıdi reabılıtolog Edýard Varýshkın.
Atalǵan ortalyq aptasyna alty kún boıy tańerteńnen keshke deıin jumys isteıdi. Shtattyq quramda reabılıtolog dáriger men eki medbıke bar. Al teatr qyzmetkerlerine ortalyqqa barýǵa bólingen arnaıy ýaqyt joq: árkim óz daıyndyǵynyń ýaqytyna qaraı keledi.
Balet bıshileriniń aıtýynsha, qoıylym barysynda aýyrsyný, dene jaraqattaryna jıi ushyraıdy. Kemi jarty jyl em alǵan kezderi bolypty. Mundaı keleńsizdikterdiń aldyn alý úshin ońaltý ortalyǵy jaqsy múmkindik boldy. Sondaı-aq teatrdyń ishinen ashylǵan ortalyq ýaqyt jaǵynan da, qarjy turǵysynan da tıimdi.
«Jumysymyzǵa baılanysty denemizge keletin zaqymdar kóp. Ásirese aıaq jaraqattaryn kóp alamyz. Aýyr kótergendikten arqa men belge salmaq túsedi. Sondyqtan osy ortalyqtyń ashylýy biz úshin óte yńǵaıly. Jumys rejimimiz óte tyǵyz bolǵandyqtan teatr janynan ashylǵanyna qýanyshtymyz. Ádette tájirıbeli mamandardy syrttan izdep, ýaqyt pen qarajat joǵaltatyn edik. О́z basym birneshe kúnnen beri lımfodrenajda em alyp júrmin. Áserin sezip jatyrmyn», deıdi balet-solısi Sultanbek Ǵumar.
Atap aıtsaq, ońaltý ortalyǵynda joǵary jıilikti lazer, lımfodrenaj, tekar terapııasy, soqqyly-tolqyndy terapııa, joǵary qarqyndy magnıt jáne ýltradybystyq terapııa syndy em-shara túrleri jasalady.
«Samruk-Kazyna Trust» áleýmettik jobalardy damytý qorynyń bas dırektory Alfııa Adıevanyń aıtýynsha, ıgi bastama álemdik tájirıbege súıene otyryp, óner maıtalmandary men mamandaryn qoldaý maqsatynda júzege asyrylǵan.
«Astana Opera» teatrynda ashylǵan ońaltý kabınetinde fızıkalyq júktemeler men jaraqattar alǵan ártister men tehnıkalyq qyzmetkerler tolyq tekseristen óte alady. Jyl saıyn 600-ge tarta maman ońaltýdan ótetin bolady. Jalpy, budan bólek elimizde 3 jasqa deıingi erekshe balalar úshin erte aralasý ortalyqtary, aýtızmi bar balalarǵa arnalǵan ortalyqtar, 18 jasqa deıingi balalarǵa jáne eresekterge arnalǵan ortalyqtarymyz bar. Teatr janynan ashylǵan ortalyq – qor qoldaýymen ashylǵan 45-ońaltý ortalyǵy. Bıyl da osy áleýmettik mańyzdy bastamamyzdy jalǵastyratyn bolamyz. Máselen, Almaty jáne Qyzylorda qalalarynda 3 jasqa deıingi balalar ońaltý ortalyǵyn, Qaraǵandy, Túrkistan, Mańǵystaý oblystarynda aýtızmi bar balalarǵa arnalǵan ortalyqty ashýdy josparlap otyrmyz», dedi ol.
Jańa ortalyqtyń aýmaǵy 114 sharshy metrdi quraıdy, atalǵan oryn buǵan deıin balet zaly bolǵan. Aıta keteıik, budan bólek teatrda shuǵyl kómek kórsetetin medısınalyq kabınet bar.
Ońaltý ortalyǵynyń ashylýy teatr ómirindegi jańa kezeńniń, tyń leptiń bastamasy bolary anyq. О́ziniń aýqymdy qoıylymdary hám trýppanyń joǵary kásibıligimen tanymal «Astana Opera» kezekti ret ınnovasııalyq izdenistiń úlgisine aınalyp otyr. Endi teatr ártisteri densaýlyqtaryna esh alańdamaı, bar zeıini men ýaqytyn shyǵarmashylyqqa aýdara alatyny qýantady. Árıne, teatr álemindegi tyń bastama basqa óner ujymdarynda da jalǵasyn tapsa eken deımiz.