Búgin Almatynyń Qala qurylysyn baqylaý basqarmasy ál-Farabı dańǵylynyń soltústiginde, Meńdiqulov býlvarynyń batysynda aıaqtalmaǵan, kópqabatty avtoturaqty buzýǵa kiriskenin málimdedi, dep habarlaıdy Egemen.kz.
Osydan on segiz jyl buryn, anyǵyraǵy 2007 jyly «SERT» AQ jalǵa alý ýchaskesinde 5 qabatty parkıng salýǵa kirisken edi. Alaıda, 2009 jyldyń aıaǵyna qaraı qurylys-montaj jumystary 1-2 qabat deńgeıinde toqyrap turyp qalǵan.
Al 2015 jyly ýaqytsha jer paıdalaný quqyǵy da toqtatylyp, ile-shala «Seısmostroızashıta» JShS mamandary qurylys nysanynyń tirek, qorshaýlaryna tekserý júrgizedi.
Sarapshylar negizgi tirek konstrýksııalarynyń tehnıkalyq ahýaly týraly qorytyndy jasap, zertteý qorytyndysyna sáıkes, qoldanystaǵy konstrýksııalardy bólshektep, buzýdy usynady.
Osydan keıin Basqarma sotqa aıaqtalmaǵan nysandy buzý jónindegi talap-aryz bergen. Sottyń 2018 jylǵy 25 sáýirdegi qaýlysymen talap-aryzdar qanaǵattandyryldy.
Aıaqtalmaǵan nysandy bólshekteý búgin bastaldy. Aıta ketý kerek, bul Medeý aýdanyndaǵy buzylyp jatqan ekinshi nysan.
Sondaı-aq, sottyń sheshimi boıynsha Radlov kóshesi, 9/1 ýchaskesi boıyndaǵy aıaqtalmaǵan ǵımaratty da súrý bastaldy.
Osy arada Almaty ákimi Erbolat Dosaevtyń qurylysty baqylaýdy kúsheıtý jónindegi tapsyrmasymen 2023 jyldyń basynan beri 65 zańsyz nysan, onyń ishinde «Mechta», KHAN jáne basqa da turǵyn úı keshenderi tolyǵymen nemese ishinara súrilgenin eske sala ketken jón.