Reseıdiń Krasnoıar qalasynda KSRO-nyń dańqty balýany, Olımpııa oıyndarynyń eki dúrkin jeńimpazy, álem chempıony, álem kýboginiń bes dúrkin jeńimpazy, úsh dúrkin Eýropa chempıony Ivan Iаrygındi eske alýǵa arnalǵan halyqaralyq týrnır aıaqtaldy.
Dańqty sportshynyń memorıalynda Reseı men Krasnoıar ólkesi komandalarynan bólek, Ázerbaıjan, Belarýs, Iran, Kýba, Qazaqstan, Qytaı, Qyrǵyzstan, Ońtústik Koreıa, О́zbekstan, Majarstan, Meksıka, Mońǵolııa, Soltústik Makedonııa, Tájikstan, Túrkııa, Úndistannan kelgen barlyǵy 500-ge tarta balýan baq synady.
«Kishi álem chempıonatyna» balanǵan jarysta elimizdiń áıelder kúresi ókilderi óte jaqsy óner kórsetti. Ásirese Elmıra Syzdyqova asqan sheberligimen tánti etti. Kezinde Rıo Olımpıadasy (2016) men Azııa oıyndarynda (2018) qola medaldy ıelenip, qurlyq chempıonatynda segiz ret (2 altyn, 2 kúmis, 4 qola) jeńis tuǵyryna kóterilgen sportshymyz áli de babynda ekenin baıqatty. Bastapqy básekelerde barlyq qarsylasyna san soqtyrǵan E.Syzdyqova jartylaı fınalda qyzdar arasyndaǵy álem, Eýropa chempıony, krasnodarlyq Olga Kozyraevany qapy qaldyrsa, fınalda álem chempıonatynyń kúmis, Azııa birinshiliginiń eki dúrkin qola júldegeri Davaanasan Enh-Amarmen aıqasty. Báseke barysynda Mońǵolııanyń maqtanyshyn 8:1 esebimen utyp jatyp, aqyrynda ony qos jaýyrynymen jerge qadady. Sóıtip, qazaq balýany 76 kg salmaq dárejesiniń bas júldesin oljalady. Bir aıta keterligi, 5 aqpanda Elmıra 33 jasqa tolady.
Elimizdiń týy astynda óner kórsetip júrgen 62 kg salmaqtaǵy Vıktorııa Hýsaınova fınaldyq synǵa deıin alqynbaı jetti. Sheshýshi básekede belarýstik Veronıka Ivanovany 3:2 esebimen jeńip jatqan edi. Sońǵy sekýndtarda qarsylasyn aıaǵyna ótkizip alyp, bes upaı berip qoıdy. Sonyń saldarynan Veronıka kúmis medaldy qanaǵat tutty. Dál sol Belarýs balýany jartylaı fınalda Tynys Dýbekten basym túsken bolatyn. Úshinshi oryn úshin beldesýde qazaq qyzy baryn saldy. Alǵashynda reseılik Olga Iаsenko úsh upaı ozyp turdy. Desek te sońyna deıin kúresken Tynys 4:3 esebimen jeńisti qarsylasynyń ýysynan julyp áketip, qola medaldy moınyna ildi.
Erkin kúresten ótken jarysta elimizdiń namysyn aǵaıyndy Qaırat, Qýat Ámirtaevtar (61 kg), Rıfat Saıbatalov (65 kg), Murat Jaqypov (74 kg) syndy balýandar qorǵady. О́kinishke qaraı, olardyń birde-bireýi jeńis tuǵyryna kóterile almady.