«Ońtústik» óńirlik qolbasshylyǵy 6-mehanıkalandyrylǵan quramasynyń shabýyldaý batalony Jambyl oblysyndaǵy «Mátibulaq» polıgonynda baqylaý atý jattyǵýlaryn ótkizdi. Onda sarbazdar shartty túrdegi qarsylastyń kózin joıdy.
«Mátibulaq» polıgonynda ótken tájirıbelik sabaqtar barysynda BMP-2 jaıaý ásker jaýyngerlik mashınasynyń qarý-jaraǵynan shartty qarsylastyń saýytty tehnıkasy men qarýlanǵan kúshteri joıyldy.
Qorǵanys mınıstrliginiń baspasóz qyzmetiniń derekteri boıynsha, jaýyngerlik is-sharanyń maqsaty – merzimdi qyzmet sarbazdarynyń taktıkalyq-arnaıy daıyndyq daǵdylaryn pysyqtap, urys qımyldary kezinde shtattyq qarýdan atýǵa mashyqtaný.
Áskerı qyzmetshiler BMP-2 jaıaý ásker jaýyngerlik mashınasynyń shtattyq qarý-jaraǵynan shartty qarsylastyń 1 500 metr qashyqtyqtaǵy saýytty tehnıkasy men tiri kúshterin ımıtasııalaıtyn nysandardy joıdy. Buǵan qosa sabaq barysynda áskerı qyzmetshiler atys daıarlyǵy, jaýyngerlik mashınanyń urystyq jıyntyǵyn jartylaı júkteý, oqjatar men taspalardy jabdyqtaý normatıvterin oryndaǵan. Sondaı-aq áskerı qyzmetshiler jaýyngerlik daǵdylardy ǵana emes, naqty urys kezinde aman qalý tásilderin de úırenip, jattyqqan. Atap aıtqanda, qıraǵan tehnıkadan ekıpajdardy evakýasııalaý jáne jaralanǵan jaýyngerlerge alǵashqy medısınalyq kómek kórsetý tájirıbesin pysyqtady.
– Tájirıbelik atys sabaqtaryn saýatty oryndaýǵa árbir jaýynger atys erejelerin, qarý-jaraqtyń materıaldyq bóligin jáne jaıaý ásker jaýyngerlik mashınasyn qoldaný taktıkasyn muqııat bilýi qajet. Sabaq kezinde sarbazdar klımaty qatal qysqy jaǵdaıda tabandylyq tanytyp, qoıylǵan barlyq mindetti sátti oryndady, – dedi shabýyldaý batalonynyń serjanty Ánýar Moldabekov.
Sondaı-aq serjanttyń aıtýynsha, jaýyngerlik daıyndyq joǵary deńgeıde ótken. Onda áskerı qyzmetshiler ózara is-qımyl jasaý daǵdylary men naqty jaýyngerlik jaǵdaıda taktıkalyq tásilderdi qoldaný qabiletin jaqsy ári der kezinde kórse bilgen. Tájirıbelik sabaqtarǵa toqsanǵa jýyq áskerı qyzmetshi qatysqan.