Almaty qalasynyń memlekettik qýyrshaq teatrynda byltyr 1 390 qoıylym usynylyp, 92 myń kórermen tamashalaǵan. Sondaı-aq ótken jyly teatr qyzmetkerleriniń jalaqysy 30%-ǵa ósken. Al 16 maman Kanada, Reseı jáne Qyrǵyzstannyń jetekshi teatr mektepterinde biliktiligin arttyrdy.
«Bul – sońǵy jyldardaǵy eń joǵary kórsetkish. Bıletterden túsken tabys ta tarıhı deńgeıge jetip, 80,8 mln teńge boldy. Qazaqstannyń qýyrshaq teatry dástúrlerdi saqtap qana qoımaı, ınnovasııalar engizip, repertýaryn keńeıtip, halyqaralyq deńgeıge de shyǵyp jatyr», deıdi teatr dırektory Almat Amangeldi.
Al bıyl Qýyrshaq teatry 90 jyldyq mereıtoıyn aýqymdy baǵdarlama boıynsha atap ótpek. Kórermenge jańa qoıylymdar, «Almaty Puppet Festival» úshinshi halyqaralyq festıvali, sondaı-aq teatr murajaıynyń ashylýy jáne tarıhı kitaptyń shyǵýy josparlanyp otyr. Sonymen qatar teatr spektaklder sanyn arttyryp, bir jylda 1 500 qoıylym qoıýdy, aýdıtorııany 95 myń kórermenge deıin ulǵaıtýdy josparlap otyr.
О́ner ujymy bıyl tórt premera – «Orman ǵajaıyptary», «Naýryz qupııasy», «Meniń atym Qoja», «Orteke» qoıylymdaryn usynady.
Aıta keteıik, buǵan deıin Qýyrshaq teatry birneshe halyqaralyq festıvalde júldeli bolǵan.