«Jolaýshylar tasymaly» AQ jolaýshylarǵa arnalǵan «Poıyz qozǵalysynyń onlaın taqtasy» atty jańa sıfrlyq servısti qoldanysqa engizdi. Endi jolaýshylar naqty ýaqyt rejıminde poıyzdardyń kelý jáne ketý ýaqytyn baqylap, qozǵalys kestesindegi ózgerister týraly jedel aqparat ala alady, dep habarlaıdy Egemen.kz Rail-news.kz-ke silteme jasap.
Bul qyzmet «Jolaýshylar tasymaly» AQ Sıtýasııalyq ortalyǵy aıasynda ázirlengen.
«Ortalyq jolaýshylar poıyzdarynyń qozǵalysyn táýlik boıy baqylap, monıtorıng júrgizedi. Poıyzdarǵa ornatylǵan GPS-trekerler derekterdi avtomatty túrde ortalyqqa jiberip, poıyzdardyń ornalasqan jerin dál anyqtaýǵa jáne qozǵalys kestesin jedel jańartýǵa múmkindik beredi. Jańa servıs jolaýshylarǵa bilet.railways.kz resmı saıtynda qoljetimdi», delingen habarlamada.
Poıyz qozǵalysy týraly aqparat alý úshin:
1. https://bilet.railways.kz saıtyna kirý qajet.
2.«Poıyz qozǵalysynyń onlaın taqtasy» bannerin basý kerek.
3. Kartadan qajetti poıyzdy tańdaý qajet.
4.Sondaı-aq, qyzmetke https://tablo-railways.kz/ru/ saıty arqyly da kirýge bolady.
«Poıyz qozǵalysynyń onlaın taqtasy» jolaýshylarǵa naqty ýaqyt rejıminde poıyzdyń qozǵalysyn kartadan baqylaýǵa (poıyz qyzyl túspen belgilenedi), tańdaǵan stansııadaǵy kelý jáne jóneltý kestesin tekserýge, qozǵalys kestesindegi ózgeristerdi bilip otyrýǵa, barlyq aıaldama stansııalaryn, olardyń kútý ýaqytyn jáne mejeli beketke shamamen kelý ýaqytyn kórýge múmkindik beredi.
Sonymen qatar Tablo-railways.kz saıtynda poıyz bıletterin onlaın satyp alý, elektrondy otyrǵyzý talonyn alý, oryndardy talap-shaǵym boıynsha qaıtarý, aǵymdaǵy poıyzdar kestesin qaraý jáne júkterdiń qunyn esepteý sııaqty qosymsha qyzmetter qoljetimdi.