2023 jyldyń 28 qazanynda Qaraǵandy oblysyndaǵy Kostenko shahtasynda jarylys pen órt saldarynan 46 kenshi qaza taýyp, 28 kenshi jaraqattanǵan edi. Bas prokýratýra osy oqıǵaǵa qatysty 106 tomdyq qylmystyq istiń sotqa joldanǵanyn habarlady, dep jazady Egemen.kz.
Sotqa deıingi tergeýdi Bas prokýratýranyń arnaıy prokýrorlary Ishki ister mınıstrligi, Sybaılas jemqorlyqqa qarsy is-qımyl agenttigi, Qarjylyq monıtorıng agenttigi jáne Tótenshe jaǵdaılar mınıstrligi qyzmetkerleri birlese júrgizgen.
Tergeý barysynda jazataıym oqıǵaǵa taý-ken jumystary kezinde qaýipsizdik erejeleriniń jappaı buzylýy sebep bolǵany anyqtalǵan. Kómir óndirý alańyndaǵy jarylysqa shoǵyrlanýy ruqsat etilgen standarttan aıtarlyqtaı asyp ketken kómir shańy jarylystarynyń tizbekti reaksııasyn týdyrǵany sebep bolǵan.
«Shahta basshylyǵy men ınjenerlik-tehnıkalyq qyzmetkerler qatarynan 10 adam qylmystyq jaýapkershilikke tartyldy. Barlyǵy qamaýda. Olarǵa Qazaqstan Respýblıkasy Qylmystyq kodeksiniń 277-babynyń 3-bóligi boıynsha («taý-ken jumystary kezinde qaýipsizdik erejelerin buzý») aıyp taǵyldy, atalǵan bap boıynsha 8 jylǵa deıin bas bostandyǵynan aıyrý jazasy qarastyrylǵan. Is boıynsha 74 adam jábirlenýshi retinde tanyldy», delingen Bas prokýratýra habarlamasynda.
Jınaqtalǵan materıaldar Qaraǵandy qalasynyń Álıhan Bókeıhan aýdanynyń aýdandyq sotyna jiberilgen.