Aımaqtarda, eldimekenderde týyndaıtyn daý-janjaldardy shıelenissiz sheshý joldary, mámilegerlik ınstıtýtty damytý, etnomedıatorlar men etnokelissóz júrgizýshilerdi daıyndaý máseleleri Aqtóbede ótken «Birlik pen kelisimge 30 jyl» atty respýblıkalyq konferensııada talqylandy.
QR QHA hatshylyǵynyń meńgerýshisi Marat Ázilhanov quramyna 4 myńnan astam qoǵamdyq uıym men etnomádenı birlestikterdi biriktirgen Qazaqstan halqy Assambleıasy músheleri eldigimizdi, egemendigimizdi nyǵaıtýda zor eńbek sińirgenin atap ótti. Sońǵy jyldary Assambleıanyń jastar qanaty óte belsendi jumys istep, el ishinde atqarylatyn ıgilikti isterden qur qalyp jatqan joq. Solardyń biri – Aqtóbe oblystyq Assambleıasynyń músheleri.
Konferensııada Assambleıanyń medıasııa baǵytyn damytý joldaryna taldaý júrgizildi. Daý-janjalǵa tap bolǵan taraptardy tatýlastyrý, keleńsiz jaǵdaılardyń aldyn alý, janjaldardy sotqa jetkizbeı sheshýde kásibı medıatorlar daıyndaýdyń erekshelikteri jóninde qazaq-nemis ýnıversıtetiniń dosenti Gúlmaıdan Orazbaeva baıandama jasady. Ol etnomedıatorlar men etnokelissóz júrgizýshilerdi elimizdiń mádenı jáne aımaqtyq erekshelikterin eskere otyryp, shıelenistiń aldyn alatyn, daý-janjaldardy retteýshi mamandar retinde oqytýdyń qajettiligin kórsetti.
Sarapshy Aıgúl Kákimbekqyzynyń aıtýynsha, elimizde 2021 jyldan bastap etnomedıatorlar daıyndaýdyń arnaıy baǵdarlamasy jasaldy. Sonyń nátıjesinde Assambleıadaǵy medıasııa keńesi jandanyp, aımaqtarda kásibı medıtorlar, etnosaralyq kıkiljińdi anyqtaıtyn sarapshylar oqytyldy. Mamannyń aıtýynsha, qazirgi ýaqytta jasyryn sıpaty bar shıelenisterdi anyqtaýda erekshe biliktilik kerek. Ásirese, turmystyq sıpatta bastalǵan daý-janjaldy shıelenistirmeý kerek.
«О́kinishtisi, turmystyq kıkiljiń órshigen kezde, oǵan etnosaralyq boıaý jaǵatyndar tabylsa, qoǵam basqasha qabyldaıdy. Janjal órshigende óshpendilik tili qalyptasyp, qarama-qarsy tarap birin aıyptaı bastaıdy. Sol úshin de janjaldyń túpki sebebin barynsha tez anyqtap, adamdarmen barynsha ashyq sóılese bilý óte mańyzdy. Keı jaǵdaıda jergilikti bılik organdary qyzmetkerleri daý-janjalǵa tap bolǵan adamdarmen ashyq sóılespegendikten, másele shıelenisedi. Eger janjal jasóspirimder arasynda týyndasa, ony tek ata-ana men muǵalimniń moınyna artyp qoımaı, jan-jaqty kómek kerek. Túpki maqsat – jaǵdaıdy ýshyqtyrmaý», deıdi maman.
Aqtóbe oblysynyń ákimi Ashat Shaharov qazirgi ýaqytta qoǵamdyq pikirdi zerdeleýde etnomedıasııanyń mańyzdy quralǵa aınalǵanyn atap ótti. «Aqtóbe oblysynda etnosaralyq jaǵdaı turaqty. Bárimiz bir eldiń azamatymyz, el – ortaq, másele de ortaq bolǵandyqtan, kez kelgen máseleni ashyq talqylaý óte mańyzdy», dep túıindedi.
Aqtóbe oblysy