19 aqpanda Astanadaǵy «Dostyq úıinde» meımandos peıildi etnos ókilderi bas qosty. Qazaqstan halqy Assambleıasynyń 30 jyldyǵyna oraılastyrylǵan «El jastarynyń birligi - bereke bastaýy» atty ashyq suhbatqa 60-tan astam jas qatysty, dep jazady Egemen.kz.
Belsendi órenderdiń jıynyna «Aýyl» partııasy uıytqy boldy. Elimizdegi ózge etnos jastarynyń saıası bastamalarǵa oń kózqarasyn qalyptastyrýdy meje tutqan jıynǵa partııa tóraǵasy, Májilis depýtaty S.Egizbaev, fraksııa depýtaty N.Arıýstın qatysty. Jastarmen emen-jarqyn áńgime órbitken S. Egizbaev babadan amanat bolyp jetken yrysty yntymaq jolyn jalǵaı túsýge úndedi.
«Qazir Qazaqstannyń baılyǵy retinde kóbine jer astyndaǵy paıdaly qazbalarymyz aıtylyp júr. Biraq bizdiń basty baılyǵymyz - jer astynda emes, jer betinde. Ol - halqymyzdyń birligi. Ata-babalarymyz, aǵa býyn ókilderi baǵa jetpes osy baılyqty siz ben bizge mura qylyp qaldyrdy. Ony saqtap, ári qaraı eselep, elge úlgi etý sizderdiń, ıaǵnı búgingi jastardyń eń asyl muraty bolýy kerek», dedi «Aýyl» partııasynyń tóraǵasy.
Birlik týyn bekemdep, bıikke kóterýge beıildi jastar qoǵamdaǵy keleli máselerge alańdaýshylyq bildirdi. Máselen osy jıynǵa Qaraǵandydan arnaıy jetken bolashaq jýrnalıst Devıvye Albına ǵalamtordaǵy qazaqsha kontent úles-salmaǵynyń azdyǵyn aıtyp, bul óz kezeginde baldyrǵandar tiliniń shubarlanýyna soqtyratynyn tilge tıek etti.
«Áıgili Mádı aqyn «atyńnan aınalaıyn, Qarqaraly» dep jyrlaǵan ólkedegi Qarakól aýylynda týyp, óstim. Boıymyzda nemis, tatar, orys ulttarynyń qany bar. Darhan kóńildi qazaǵymnyń ortasynda boıjetken soń tilim qazaq tilinde shyqty, qazaq mektebinde bilim aldym. Qazir de E. Bóketov atyndaǵy ýnıversıtette qazaq tobynda bilim alamyn. Orys tilin Qaraǵandyǵa kelip úırendim. Meni áleýmettik jelilerdegi jalǵan aqparat pen qazaq tilindegi kontenttiń azdyǵy tolǵandyrady», degen Albına «Aýyl» partııasyna ulttyq qundylyqqa sýarylǵan jańalyqtardy kóbeıtý jolyn qarastyryp, ótinish - tilegin Májilis minberinen kóterýdi surady.
О́z kezeginde partııa músheleri aǵa býyn men jastardyń talap-tilegi bir arnada toǵysyp jatqanyna toqtalyp, bul baǵytta qazirdiń ózinde atqarylyp jatqan sharalardy tarmaqtady ári aldaǵy ýaqytta da bul is jalǵasatynyn jetkizdi.
Jıynda «Aýyl» partııasy qoǵamdyq-saıası jumys departamentiniń dırektory, etnıkalyq saıasat boıynsha zertteýshi J. Karınbaev tereń tarıhty etnosaralyq qatynas týraly baıandama jasady.
Ashyq suhbat barysynda jastar kókeıindegi saýaldaryn ortaǵa salyp, partııa músheleri tarapynan tushymdy jaýap aldy.
Shara sońynda «Aýyl» sapynan kórinýge suranys bildirgen 10 jasqa partııalyq bılet tabystaldy.