Kólik mınıstrliginiń jańa halyqaralyq reısterdi ashý boıynsha júrgizip jatqan jumysy sheńberinde qazaqstandyq áýekompanııalar Grýzııa men Qytaı baǵyttary boıynsha jańa reısterdi iske qosady, dep habarlaıdy Egemen.kz.
Máselen, bıylǵy jyldyń 27 mamyrynan bastap «Air Astana» áýekompanııasy Atyraýdan Tbılısıge tikeleı reısterdi iske qosýdy josparlap otyr. Reıster aptasyna 3 ret seısenbi, juma jáne jeksenbi kúnderi Airbus tıpti áýe kemelerimen oryndalady. Búgingi tańda Tbılısıge reıster Almaty jáne Aqtaý qalalarynan oryndalady.
Sonymen qatar bıylǵy jyldyń 28 mamyrynan bastap «SCAT» áýekompanııasy Shymkent qalasynan Sıan qalasyna tikeleı reısterdi iske qosýdy josparlap otyr. Reıster sársenbi jáne senbi kúnderi oryndalady. Tikeleı reısterdi Qytaı áýekompanııalary Almaty men Astanadan oryndaıdy.
Jańa baǵyttardyń ashylýy elder arasyndaǵy saýda-ekonomıkalyq, ınvestısııalyq, týrıstik jáne mádenı yntymaqtastyqty odan ári damytýǵa yqpal etpek.