Memleket basshysy N.Nazarbaev taıaý jyldary Qazaqstan halqyn 20 mıllıonǵa jetkizý mindetin qoıyp, aldaǵy maqsatqa jetý joldaryn belgilep bergeni ózimizge belgili. О́kinishtisi sol, Qyzyljar óńirinde bala týý jaıy áli kóńil kónshitpeıdi. Sábılerdiń kúlkisi jıi estiletin Mańǵystaý oblysynda ár 1000 adamǵa shaqqanda 23 baladan aınalsa, Qyzyljar óńirinde eki esedeı az, respýblıkalyq orta kórsetkishten kóp tómen. 2008 jyly 9085 sábı dúnıege kelse, byltyr bul san 8797-ge deıin kemip ketken.
Jas analardyń bala sanyn alańsyz kóbeıtýine qamqorlyq jasaý birinshi kezektegi másele ekeni aıtpasa da túsinikti. Oblystyq ákimdikte “Urpaq qory” atty baǵdarlamanyń tanystyrylymy ótken rásimde jas otbasylardy “balaly úı — bazarǵa” aınaldyrýdyń joldary jan-jaqty sóz boldy. Aımaq basshysy Serik Bilálovtiń bastamasymen elimizde alǵash ret qolǵa alynyp otyrǵan jańa baǵdarlama týraly oblys ákiminiń orynbasary Farhad Qýanǵanov baıandap berdi. Tusaýy kesilgen pılottyq jobanyń negizgi maqsaty – tórt jáne odan da kóp balasy bar otbasylardaǵy kámeletke tolmaǵan ár sábıge bankte 1,5 myń dollar mólsherinde depozıt ashý máselesin qarastyrý. Ol jylyna on paıyzdyq ósimdi qurap, sábı 18 jasqa tolǵanda jeke esebindegi qarjy 8 myń dollarǵa jetetin bolady. Ol aqsha kámeletke tolǵan jastyń oqýyna, turǵyn úı alýyna, taǵy basqa qajetterine jumsalady. Baǵdarlama birinshi qyrkúıekten bastap júzege asyryla bastaıdy.
Jıynda sóz alǵandar ana men balanyń densaýlyǵyn jaqsartý, sábılerdiń ólimin azaıtý, ekinshi dárejeli bankterdi tańdaý máseleleri jóninde óz usynystaryn ortaǵa saldy. “Urpaq qory” baǵdarlamasyna qoldaý bildirildi.
– Bes jylǵa arnalǵan baǵdarlamanyń bala asyrap alǵan otbasylarǵa da tikeleı qatysy bar. Mysaly, bir otbasy 4 bala asyrap alatyn bolsa, árqaısysynyń esepshotyna 1500 dollar salynyp, jyl saıyn ulǵaıyp otyrady. Munyń ózi jetim balalardyń sanyn azaıtýǵa múmkindik týdyrary sózsiz. Keıin memlekettik zakazǵa engizýge kúsh salatyn bolamyz,— dedi Serik Sultanǵazyuly basqosýdy túıindeı kelip.
О́MIR ESQALI, Soltústik Qazaqstan oblysy.