Zamanaýı keshen

Kelesi jyly Qazaqstan jáne Reseı Prezıdentteriniń qatysýymen Qyzyljar óńirinde aımaqaralyq forýmnyń ótetinine baılanysty mańyzdy sharaǵa tastúıin daıyndyq qyzý jalǵasyn tapty. Solardyń birine oblys ortalyǵynda «Hampton by Hilton» elıtalyq qonaqúıdiń irgetasyn qalaýǵa arnalǵan rásimdi ataýǵa bolady. Atal­mysh nysannyń jobasyn arnaıy tapsyryspen máskeýlik mamandar jasapty. Jeti qa­battan turatyn 4 juldyzdy kópbeıindi qonaqúı kesheninde 120 nómir bolady: olardyń 2-eýi– prezıdenttik, 2-eýi – lıýks, 10-y – delıýks, qalǵandary – standartty nómirler. Kózdiń jaýyn alatyn ǵımaratta sonymen qatar, fıtnes ortalyǵy, konferens zaly, meıramhana, holl, al tómengi qabattarda sýpermarket, saýda oryndary ornalasady. Jalpy, aýmaǵy 11 myń sharshy metrdi quraıtyn ári oblysta balamasy joq keshenniń quny 1 mıllıard 23 mıl­lıon teńgege baǵalanyp otyr. – Investor men bas merdiger álemdik talaptarǵa tolyq jaýap beretin nysandy bir jyldyń ishinde paıdalanýǵa berýge mindettenip otyr. Alǵash­qy kópbeıindi qonaqúı óńirde týrızmdi damytýǵa, elı­talyq bıznes ókilderin joǵa­ry dárejede qabyl­daýǵa múm­kindik beredi, – deı kelip, oblys áki­miniń orynbasary Erlan Áýkenov jergilikti qurylys ma­te­rıaldaryn keńinen qoldaný qajettigin atap kórsetti. Atalmysh nysannyń qu­ryl­taıshysy, Petropavl qa­lasynyń týmasy Dmıtrıı Ko­shelev bas merdiger «Ýdarnık SK» JShS bolyp tabylatynyn, qurylysqa «Nord hotel Group» kompanııasynyń qar­jysy jumsalatynyn jet­kizdi. Sonymen birge, bank ne­sıesiniń syıaqysyn demeý­qarjylandyrýǵa jáne ın­fra­qurylymdar tartýǵa «Bı­z­­nestiń jol kartasy-2020» baǵdarlamasy já­ne «Da­­mý»qory arqyly mem­le­ket­tik qol­daý kórsetý bel­gi­lengen. Onyń sózine qaraǵanda, Reseı men Qazaqstanda úlgili ǵıma­rattar salýmen aınalysatyn seriktestiktiń tájirıbesi mol kórinedi. Tórtkúl dúnıege ke­ńinen tanymal «Hilton» brendin qoldaný qalanyń qaq tórinde sáýletti ǵımarattyń boı kóte­retinine senimdi. Saltanatty rásimnen keıin «Hampton by Hilton»  qonaqúıiniń qurylysyna arnalǵan kapsýla tasqa burǵylanǵan oıyqqa ornatyldy. Jeke ınvestorlardyń qa­rajatyna turǵyzylyp jat­qan taǵy bir jańa qonaqúıdiń ishki árleý jumys­tary atqa­rylýda. Úshinshi qonaqúıdiń qurylysy taıaý ýaqytta bas­talady. О́mir ESQALI, «Egemen Qazaqstan». Soltústik Qazaqstan oblysy.