Elimizde Ulttyq Biryńǵaı Testileý (UBT) suraqtaryn jasandy ıntellekt arqyly ázirleý josparlanǵan. Bul týraly Ǵylym jáne joǵary bilim mınıstrligi Memlekettik qyzmetterdi sıfrlandyrý jáne avtomattandyrý departamentiniń dırektory Nursultan Mahatov málimdedi, dep habarlaıdy Egemen.kz.
Nursultan Mahatov ulttyq jasandy ıntellekt platformasynda bes jobany júzege asyrý josparlanyp otyrǵanyn atap ótti.
«Jasandy ıntellekt salasyndaǵy jobalarǵa keletin bolsaq, Ǵylym jáne joǵary bilim mınıstrligi Sıfrlandyrý mınıstrligimen birge ulttyq JI platformasynda bes jobany júzege asyrýdy josparlap otyr. Olardyń ishinde 2025 jyly UBT ótkizýge baılanysty normatıvtik erejeler, statıstıkalyq aqparattar jáne granttarǵa túsý boıynsha konsýltasııalar beretin AI Talapker chat-boty bar. Sondaı-aq, UBT tapsyrý kezinde akademııalyq adaldyqty arttyrý úshin jáne test tapsyrmalaryn ázirleý úshin JI engizý josparlanǵan», dedi N.Mahatov.