Astanada sot 4 mıllıon teńgeden astam alıment qaryzy bar er adamdy ata-ana quqyǵynan aıyrdy, dep habarlaıdy Egemen.kz.
Iývenaldy sotta qaralǵan is boıynsha er adam balasyna qamqorlyq kórsetpegen, materıaldyq qamtamasyz etpegen jáne onyń tárbıesine aralaspaǵan.
Sot prosesinde anyqtalǵandaı, ákesi resmı túrde esh jerde jumys istemegen; 20 jyldan beri qumar oıynǵa táýeldi; ulynyń ómirine aralasý nıeti joq ekenin moıyndady.
Sot psıhologynyń zertteýine sáıkes, bala da ákesimen aralasýǵa qulyqsyz ekenin bildirgen.
Sot er adamdy ata-ana quqyǵynan aıyrdy, alaıda bul ony balasyna alıment tóleý mindetinen bosatpaıdy. Er adam burynǵydaı qarjylyq jaýapkershiligin oryndaýǵa tıis. Sheshim zańdy kúshine endi.