Premer-mınıstr Oljas Bektenovti Ázerbaıjan Respýblıkasynyń Prezıdenti Ilham Álıev qabyldady. Memleket basshylarynyń arasyndaǵy senimdi qarym-qatynastyń arqasynda eki eldiń yntymaqtastyǵy jańa deńgeıge kóterildi, dep habarlaıdy Egemen.kz Úkimettiń baspasóz qyzmetine silteme jasap.
Ázerbaıjan Respýblıkasynyń Premer-mınıstri Álı Asadovpen úkimetaralyq kelissózder barysynda saýda-ekonomıkalyq yntymaqtastyq, kólik-logıstıka salasyndaǵy ózara is-qımyl, mádenı-gýmanıtarlyq baılanystardy damytý máseleleri talqylandy.
«2024 jyly eki el arasyndaǵy taýar aınalymy $533 mln-dy qurady. Qazaqstan Ázerbaıjanǵa $340 mln-nan astam somaǵa shıkizattyq emes taýarlardyń 130 túrin jetkizýdi arttyrýǵa daıyn. Kólik-logıstıka salasyndaǵy ózara is-qımylǵa nazar aýdaryldy. О́tken jyly Transkaspıı halyqaralyq kólik baǵyty boıynsha júk tasymaldaý kólemi 62%-ǵa ósip, 4,5 mln tonnaǵa jetti. Eki eldiń temir joldary arasynda Digital Trade Corridor platformasyn ıntegrasııalaý aıaqtaldy», delingen habarlamada.
Taraptar ekijaqty taýar aınalymyn neǵurlym joǵary deńgeıge kóterý úshin bar kúsh-jigerin jumsaýǵa nıetti ekenin rastady.
Kezdesýler qorytyndysy boıynsha ekijaqty birqatar qujatqa qol qoıyldy. Olardyń ishinde Qazaqstan-Ázerbaıjan baǵytyndaǵy sý asty talshyqty-optıkalyq baılanys jelisin jobalaý jáne salý jónindegi qujat bar. Joba baılanystyń sapasy men senimdiligin arttyrý, Azııa men Eýropa arasyndaǵy derekterdi berýdi keńeıtý úshin strategııalyq mańyzǵa ıe.
Sondaı-aq kelissózder barysynda eki eldiń mádenı-gýmanıtarlyq saladaǵy ózara is-qımyly talqylandy. Ázerbaıjan tarapy Qazaqstannyń Qarabaqty qalpyna keltirý úderisine qosqan úlesin joǵary baǵalady.