ASTANA. 4 mamyr. Túrkııada Nursultan Nazarbaevtyń qurmetine áýe sharlary (aerostat) ushyryldy. Elbasynyń prezıdenttik saılaýda jeńiske jetýine baılanysty uıymdastyrylǵan shara Nevshehır aımaǵyndaǵy álemge tanymal «Kappadokııa» týrıstik ortalyǵynda ótti. Áýege kóterilgen sharlarǵa Qazaqstan Prezıdentiniń portreti, quttyqtaý sózder jáne eki eldiń memlekettik týlary ilindi. Bul týraly gazeta.kz habarlady.
Qazaqstannyń Túrkııadaǵy Elshiligi taratqan málimetke súıensek, atalǵan shara Memleket basshysynyń saılaýdaǵy jeńisine jáne Qazaqstan halqynyń birligi kúni merekesine arnalǵan. Bul tyń bastamaǵa BAQ ókilderi men jergilikti jáne sheteldik týrıster kýá boldy.
Aerostat ushqyshy Hakky Iyldyz Elbasynyń jarqyn jeńisimen barsha qazaqstandyqty qazaq tilinde quttyqtady. «Baýyrlas qazaq halqyna beıbitshilik pen turaqtylyq jáne jarqyn bolashaq tileımin», – dedi ol óz quttyqtaýynda.
Kókke kóterilgen sharlar Kappadokııa taýymen úılesim taýyp, týrısterdi umytylmas áserge bóledi.
Kappadokııa taýy óziniń biregeı geologııasy jáne ejelgi ǵıbadathanalarymen belgili. Al osy aımaqtaǵy Gereme ulttyq saıabaǵy UNESCO-nyń búkilálemdik muralarynyń qataryna qosylǵan. Sondaı-aq, bul tarıhı ólkede atalǵan áýe sharlary da asa tanymaldylyqqa ıe.
Aıta keteıik, Nevshehır aımaǵynda Nursultan Nazarbaev atyndaǵy dańǵyl, Qazaqstan atyndaǵy jelek, «Qazaqstan men Túrkııanyń dostyǵy» saıabaǵy jáne «Nevshehır» ýnıversıtetinde «Qazaqstan» aýdıtorııasy bar.
Elaman Qońyr.
Derek, sýret: gazeta.kz.