IIM zańsyz aınalymdaǵy qarýdy, onyń ishinde qańtar oqıǵasy kezinde urlanǵan qarý-jaraqty tabý jáne tárkileý boıynsha jumysty jalǵastyryp jatyr, dep habarlaıdy Egemen.kz.
Osy jumys aıasynda polıseıler birneshe oblystyń aýmaǵynda qarý jasyrylǵan tórt oryndy tapty. Olardyń úsheýinde qańtar oqıǵasy kezinde urlanǵan qarý-jaraq pen oq-dáriler jasyrylǵany anyqtaldy.
Qańtar oqıǵasy kezinde urlanǵan qarý-jaraqtyń bir parasy Jarkent qalasynyń mańynda qaraýsyz qalǵan ǵımarattan tabylyp, Remington 11-87 markaly tegis uńǵyly myltyq tárkilendi.
Jambyl oblysy Birlesý aýylynyń shetinde qarý jasyrylǵan jer tabyldy, onda Benelli modeliniń tegis uńǵyly myltyǵy (qańtar oqıǵasy kezinde urlanǵan), qos uńǵyly ańshy myltyǵy, qol granatasy jáne tórt patron tárkilendi.
Sonymen qatar Jańatas qalasynyń janynda tegis eki uńǵyly myltyq, gaz tapanshasy jáne úsh oq-dári jasyrylǵan oryn anyqtaldy.
Almaty oblysyndaǵy kentterdiń birinde aryqtan ártúrli kalıbrli eki ańshy myltyǵy (olardyń biri qańtar oqıǵasy kezinde urlanǵan), jaryq-shý granatasy, AK-74 magazıni, jeti patron jáne qara taktıkalyq betperde tabyldy.
IIM nómirleri joıylǵan qarý-jaraq pen oq-dárilerge qatysty qosymsha tekserýler júrgizedi.
Aıta keteıik, keıingi úsh jylda jedel is-sharalardyń, tintý men reıdterdiń arqasynda túrli 8 119 qarý, 845 granata, 114 myńnan astam oq-dári tabylyp, tárkilengen. Sondaı-aq 738 qarý jasyrylǵan oryn tabylǵan.