ASTANA. 4 mamyr. Fınlıandııa qorǵanys mınıstrligi soǵys bola qalǵan jaǵdaıda áskerı rezervti qurap alý maqsatynda eldiń 900 myń azamatyna hat joldady. Bul týraly nemistiń Deutsche Welle gazeti habarlady.
Newswee jýrnaly senbi, 2 mamyr kúni habarlaǵandaı, qorǵanys mınıstrliginiń joldaýynda olardyń áskerı janjal týa qalǵan jaǵdaıda paıdalanatyn rezerv retinde daıyndalatyny aıtylǵan. Osyǵan baılanysty rezervshilerden ózderiniń qazirgi barlyq jeke jaǵdaılaryn aktýaldy qalypqa keltirý suralǵan.
Helsınkıdegi qorǵanys vedomstvosy bul suranystardyń Reseı tarapynan bolyp qalýy yqtımal soǵys qaýpine baılanysty jasalyp jatqanyn joqqa shyǵaryp otyr. Newsweek málimdegendeı, qorǵanys mınıstrliginiń resmı ókili atalmysh hattyń Fınlıandııanyń shekarasy aýmaǵyndaǵy qaýip-qaterge eshqandaı qatysy joq ekenin aıtqan.
2014 jyldyń qazan aıynda fınniń áskerı-áýe kúshteri eldiń áýe keńistigindegi tártiptiń Reseı áskerı ushaqtary tarapynan jıi buzylýyna baılanysty aspanǵa ushyp shyǵý jıiligin arttyrǵan bolatyn. Budan basqa, 2015 jyldyń sáýir aıynyń sońynda Fınlıandııanyń teńizdegi jaǵalaýynan tanylmaǵan sý asty nysany baıqalyp qalǵan bolatyn. Munyń súńgýir qaıyq bolýy ábden múmkin ekeni de aıtylýda. Qazirgi tańda bul elde NATO-ǵa ótý-ótpeý máselesi úlken pikirtalasqa aınalyp jatyr.
Qurysh Nurymbet.
Derek, sýret: Deutsche Welle.