Dalanyń dıdary jipsip, taý-teńiz qar kúrt erigen kezde qaýiptiń kóbeıetindigi belgili. Syn saǵatta tııanaqty daıyndyq jasaǵan jer ǵana aıtyp keletin apattyń aldyn ala alady.
Aqkól aýdany kóktemgi qarbalasqa qapysyz daıyndalǵan syńaıly. Aýdandyq bıýdjetten 150 mıllıon teńge qarajat bólinip, ınjenerlik, evakýasııalaýǵa qajetti tehnıka daıyndyq sapyna qoıylǵan. Eldi mekenderden 37 560 tekshe metr qar shyǵaryldy. Inertti materıaldar salynǵan eki myń danadan astam qap daıyndaldy. Qajetti janar-jaǵar maı qory jınaqtalǵan. 12 128 orynǵa shaqtalǵan 17 oryn ázirlengen. Aýdandyq bıýdjet esebinen sý tasqyny bola qalsa, qajettiligi qatty seziletin qurylǵylar, 6 motopmpa, eki dron, baılanys quraldary alynǵan. Sý tasqynyn aldyn alý jóninde keshendi jospar túzilgen. Osy jospar boıynsha Jalǵyzqaraǵaı aýylynyń aınalasyna uzyndyǵy myń metr, Ýrıýpınka aýylynyń shyǵys jaq betkeıine 643 metr, Krasnobor sý qoımasynyń jaǵalaýyna 800 metrge jýyq úıindi kóterilgen.
– Buǵan deıin Eńbek aýylynyń mańyndaǵy Jarlykól kóliniń jaǵalaýyna bóget ornatý jumystaryn júrgizdik, – deıdi aýdan ákiminiń orynbasary Saıat Kenjetaı. – Bógetti ınertti materıaldarmen toltyrý, nyǵaıtýǵa aýdandyq bıýdjetten 7 mıllıon teńge qarajat bólindi. Aýdanda 117 sý ótkizý qurylǵylary bar. Onyń 23-i respýblıkalyq mańyzdaǵy avtojoldardyń boıyna ornatylsa, qalǵandary eldi mekenderdiń enshisinde. Joldy sý shaıyp ketpeý úshin eńister men saı-salanyń yqtımal tustary ekshelip, pysyqtalyp jatyr.
Aqkól qalasynyń ishindegi sý ótkizetin qurylǵylardy qasat qar men muzdan tazalaýǵa qala ákimdigi «Kamıla» jaýapkershiligi shekteýli seriktestigimen kelisimshart jasasypty. Joldardy tazalaý, kútip ustaý jumysyn «GoldenTrend» seriktestigi men jergilikti sharýa qojalyqtary atqarady. Krasnobor sý qoımasy Begıchevskoe, Aqsýat, Tasmola bógetteri, Kamenka, Ernazar, Golýbaıa Nıva, Kókteke toǵandary tárizdi segiz gıdrotehnıkalyq qurylys mańy qatty qadaǵalanyp otyr. Qyzyl sý júrgen kezde táýlik boıy kezekshilik uıymdastyrý josparlanǵan. О́tken jyldyń qazan aıynda Esil basseındik ınspeksııasy men tótenshe jaǵdaılar qyzmetiniń mamandary aýdandyq ákimdikpen birlesip, joǵaryda atalǵan qurylǵylardy teksergen bolatyn. Tekseris qorytyndysyna qaraǵanda, qurylǵylardyń jaı-kúıi qanaǵattanarlyq.
Eger kún kúrt jylynyp, qyzyl sý qarqyndy júretin bolsa, Krasnobor sý qoımasyndaǵy sý deńgeıi kúrt kóterilýi de múmkin. Bul jaı óte qaýipti. 2024 jyldyń kókteminde Krasnobor sý qoımasyndaǵy sýdyń deńgeıi 145 santımetrge deıin kóterildi. Sol kezde sý qoımasynyń bógetin topyraqpen kómkerip, tosqaýyl qoıý jumystary júrgizildi. Bıyl da ol jumys jalǵasýy múmkin.
Talqara ózeninde muz keptelisterin buzyp, sý erkin ótýi úshin «KMD Holding» jaýapkershiligi shekteýli seriktestigi men oblystyq tótenshe jaǵdaılar departamenti birlesip, Ýrıýpın aýyldyq okrýgi aýmaǵynda ózenniń muzyn usaqtaý maqsatynda jarylys jumystary uıymdastyryldy. Oǵan 264 kılo jarylǵysh zat jumsaldy.
Búgingi jumysty bekemdeýde ótkenniń sabaǵyn umytpaǵan abzal. Byltyr sý tasqyny kezinde Ýrıýpın selolyq okrýgi aýmaǵyndaǵy jergilikti mańyzy bar Ýrıýpınka – Mereke tas jolynyń alty shaqyrymǵa jýyǵyn qyzyl sý basyp qalǵan bolatyn. Bul jaıdyń búgin de qaıtalanýy ábden múmkin. Aýdandaǵy eldi meken turǵyndary jol azabyn kórgen de osy kez. Amangeldi aýylyna kireberistegi avtojoldy da sý shaıyp ketti.
– Erigen qar sýynyń kóp mólsheri osy jerden ótetindikten, bul jaǵdaı jylda qaıtalansa da eldi mekenderge asa bir qaýip tóndirmeıdi, – deıdi aýdan ákiminiń orynbasary.
Jarqaıyń aýdany da kóktemgi sý tasqynyna daıyndyqty pysyqtaı tústi. Derjavınsk qalasynda jospardan tys oqý jattyǵýlary ótkizildi. Negizgi maqsaty – qapysyz qamdaný. Oqý-jattyǵýǵa qyryqtan astam adam men 24 arnaıy tehnıka qatystyryldy. Tabıǵattyń minezin kúni buryn boljaý qıyn. Árqıly jaǵdaılar eskerildi. Qorǵanysty nyǵaıtyp, jedel is-qımyldy úılestirý, aýdan jurtshylyǵyn habardar etý sharalary qarastyryldy.
– Bul oqý-jattyǵýlar is-qımyl algorıtmin pysyqtaýǵa, álsiz tustarymyzdy anyqtaýǵa múmkindik beredi, – deıdi Jarqaıyń aýdanynyń ákimi Erbol Júsipbekov.
Qazirdiń ózinde Kóksheniń kún sáýlesi jaqsy túsetin qyrattaryndaǵy qasat qardyń mańdaıy tership, móldir monshaq jıilegen. Kóktem ózimen birge syndarly synaǵyn ala keledi. Sol synaqqa muqııat qamdanǵan jón.
Aqmola oblysy