8–16 naýryz aralyǵynda Serbııanyń Nısh qalasynda bokstan áıelder arasyndaǵy álem chempıonatynyń jalaýy jelbireıdi. Bul jarysta 70-ke jýyq memleketten 350-ge tarta burymdyldar baq synaıdy. Qatysýshylar 12 salmaq dárejesinde medaldar jıyntyǵyn sarapqa salady.
Doda byltyr Astanada ótýge tıis edi. Keıinnen IBA sheshimin ózgertti. Sóıtip, jarystyń ótetin merzimimen qosa, ony qabyldaıtyn jer de aýystyryldy. Aıta keterlik bir jaıt, Serbııadaǵy saıystyń júlde qory asa qomaqty. Máselen, altynnan alqa taqqan boksshy 100 000 AQSh dollary kóleminde syıaqy alady. Aqtyq synda utylǵandar sol somanyń teń jartysyna ıe bolady. Qola medaldy moınyna ilgenderge 25 000 tıesili. Tipten, shırek fınalda súringender de úılerine quralaqan qaıtpaıdy. Olar 10 000 dollardy qaltaǵa basady.
Bokstan áıelder arasyndaǵy álem chempıonaty 2001 jyldan beri úzdiksiz uıymdastyrylyp keledi. Tusaýkeser týrnırdi AQSh-tyń Skranton qalasy qabyldady. Odan keıingi jarystar 2002 jyly Túrkııanyń Antalıasy men 2005 jyly Reseıdiń Podolskisinde ótti. Elimizdiń quramasy óziniń alǵashqy júldesine 2006 jyly qol jetkizdi. Nıý-Delıde shymyldyǵy túrilgen dodada 46 kg salmaqta synǵa túsken Nazgúl Boranbaeva qola medaldy moınynda jarqyratty. 2008 jyly Qytaıdyń Nınbosynda Elena Kolsova (70 kg) dál sol mejeden kórindi.
2010 jyly Barbadostyń bas shahary – Brıdjtaýnda eki arýymyz jeńis tuǵyryna kóterildi. Nazgúl Boranbaeva (48 kg) óziniń tórt jyl burynǵy nátıjesin qaıtalasa, Marına Volnova (81 kg) fınalda utyldy.
2011 jyly dál sondaı kórsetkishke qol jetkizdik. Qytaıdyń Sınhýandaosynda eń jeńil jáne asa aýyr salmaqtaǵy sportshylarymyz úzdikter qatarynan kórindi. Atap aıtsaq, Iýldýz Mamatqulova (+81 kg) ekinshi, Nazym Qyzaıbaı (48 kg) úshinshi oryndy ıelendi.
2014 jyly Ońtústik Koreıanyń Chendjý qalasynda qazaqtyń qos arýy fınalǵa shyqty. Sheshýshi tusta úndistandyq Sardjýbala Devıdi utqan Nazym Qyzaıbaıdyń (48 kg) esimi áıelder boksyn serik etken otandastarmyzdyń arasynan shyqqan tuńǵysh álem chempıony retinde tarıhta qaldy. Lázzat Kúngeıbaeva (+81 kg) sońǵy synda reseılik Zenfıra Magomedalıevadan jeńildi.
2016 jylǵy álem chempıonaty Astanada ótti. Asa jaýapty jarysqa tyńǵylyqty daıarlanǵan burymdylarymyz óreli ónerlerimen óz jankúıerlerin qýantty. Arqa tósinde Nazym Qyzaıbaı (48 kg), Dına Jolaman (54 kg), Valentına Halzova (64 kg), Lázzat Kúngeıbaeva (+81 kg) qarsylas shyq keltirmese, Jaına Shekerbekova (51 kg) men Aıjan Qojabekova (57 kg) úzdik úshtikti túıindedi. Nátıjesinde, 4 altyn men 2 qolany oljalaǵan otandastarymyz óz tarıhynda tuńǵysh ret jalpy komandalyq esepte jeke-dara kósh bastady.
2018 jyly jer-jahannyń myqtylary Úndistannyń bas shaharynda toǵysty. Nıý-Delıde Jaına Shekerbekovanyń (51 kg) kúmisi men Karına Ibragımovanyń (60 kg) qolasyn qanaǵat tuttyq. 2019 jyly Ýlan-Ýdede qorjynymyzǵa qos qola medal tústi. Ony Mılana Safronova (64 kg) men Dına Islambekova (81 kg) ıelendi. 2022 jyly Ystanbulda Alýa Balqybekova (48 kg) kúmispen kúptelse, Jaına Shekerbekova (51 kg), Dına Jolaman (54 kg), Karına Ibragımova (60 kg), Valentına Halzova (64 kg) qolaǵa qol jetkizdi.
Sońǵy álemdik doda osydan eki jyl buryn qaıta Nıý-Delıde uıymdastyryldy. Úndistanda Karına Ibragımova (60 kg) men Lázzat Kúngeıbaeva (+81 kg) aqtyq synǵa alqynbaı jetkenimen, sheshýshi tusta jeńilistiń kermek dámin tatty. Karına ıtalııalyq Irma Testaǵa, Lázzat marokkolyq Hadıdja ál-Mardıge jol berdi. Alýa Balqybekova (48 kg), Nadejda Rıabes (66 kg), Valentına Halzova (75 kg), Farıza Sholtaı (81 kg) úshinshi satyǵa turaqtady.
Nısh qalasynda jerlesterimizdiń qandaı quramda óner kórsetetini belgili boldy. Elimiz quramasynyń bas bapkeri Eldos Saıdalınniń tańdaýy myna bylǵary qolǵap sheberlerine tústi: 48 kg – Nazym Qyzaıbaı, 50 kg – Alýa Balqybekova, 52 kg – Anıta Ádisheva, 54 kg – Jaına Shekerbekova, 57 kg – Karına Ibragımova, 60 kg – Vıktorııa Grafeeva, 63 kg – Aıda Ábikeeva, 66 kg – Jasmın Qızatova, 70 kg – Natalıa Bogdanova, 75 kg – Nadejda Rıabes, 81 kg – Gúlsaıa Erjan, +81 kg – Eldana Tálipova.
Esimderi atalǵan burymdylardyń deni talaı dúrmekte ysylǵan saqa sportshylar. Nazym Qyzaıbaı – eki dúrkin álem chempıony, Parıj Olımpıadasynyń qola júldegeri. Osydan tórt jyl buryn Dýbaıdaǵy Azııa birinshiliginde daralandy. Jasy 31-den assa da Nazym áli babynda. Ár jyldary Jaına Shekerbekova, Karına Ibragımova, Nadejda Rıabes Olımpııa oıyndaryna qatysty. Tórtjyldyqtyń basty dodasynda baǵy janbaǵanymen, álem, qurlyq chempıonattarynda san márte jeńis tuǵyryna kóterildi. Alýa Balqybekova dúnıejúzilik dodada birneshe ret júldegerler qatarynan kórinip, Azııada eki ret altynnan alqa taqty. Sol sekildi basqa da jerlesterimizdiń baǵyndyrǵan belesteri bir tóbe.