QOSTANAI. 4 mamyr. Osydan bir aı buryn joǵalyp ketken 17 jastaǵy Nurgúl Aǵybaevanyń denesin arnaıy qurylǵan tergeý-izdestirý toby Tobyl ózeninen tapty. Bul týraly egemen.kz tilshisi habarlady.
Sot-medısınalyq saraptamasynyń nátıjesi kórsetkendeı, qyzdyń denesinde eshqandaı zorlyq-zombylyqtyń izi joq. Ol ókpesi sýǵa tolyp, tunshyǵyp ólgen. Tergeý jumystary onyń sýısıdten bolǵanyn da joqqa shyǵarmaı otyr.
Eske sala ketsek, Nurgúl Qostanaı qalasynda kolledjde oqyǵan. Qostanaı qalasynda ol turǵan týystarynyń úıi qyzdyń denesi tabylǵan Tobyldyń ıininen alys emes. Onyń aǵasynyń aıtýyna qaraǵanda, 3 sáýir kúni sabaqqa jınalǵan, biraq kolledjge barmaǵan, sýmkasy, zattary úıde qalǵan. Telefony jaýap bermegen. Qyzdyń anasynyń aıtýynsha, onyń telefonyna túngi 22.30 deıin qońyraý baryp turǵan, odan keıin sóndirilgen. Polısııa qyzdyń ata-anasyna sońǵy qońyraýdy qala túbindegi Amangeldi selosyndaǵy shamamen Energetık kóshesiniń 1 úıinen jasalǵandyǵyn, sodan keıin baılanystyń úzilip ketkenin jetkizgen.
Qostanaıda jasóspirimderdiń joǵalýy azaımaı tur. Sáýir aıynda joǵalǵan ul men qyz áli izdestirilýde.
Názıra Járimbetova.
Derek, sýret: alau.kz